ក្រុមហ៊ុន ឧកញ៉ា ទ្រី ភាព Preah Vihear
Wednesday, 09 April 2014
ឈើទាំងនេះ ត្រូវបានគេឃើញដឹកជាហូរហែនៅក្នុងខេត្តព្រះវិហារកាលពីថ្ងៃចុងសប្ដាហ៍មុន។ រូបថត ម៉ៃ ទិត្យថារ៉ា
នៅក្នុងគោយន្តដែលផ្ទុកទៅដោយឈើធ្វើចរាចរណ៍ដោយសេរីនៅក្នុង ឃុំធ្មា ស្រុកជ័យសែន លោក ថោង កុសល ជាឈ្មោះដែលអ្នកសារព័ត៌មានដាក់ឲ្យដែលជាពលរដ្ឋម្នាក់តែងចេញមុខ ប្រឆាំងជាមួយនឹងឈ្មួញឈើនៅក្នុងឃុំរបស់លោកបានថ្លែងថា មានថៅកែរងរបស់ក្រុមហ៊ុន លោក ឧកញ៉ា ទ្រី ភាព បានមកក្នុងភូមិប្រាប់ប្រជាពលរដ្ឋឲ្យដើរទៅកាប់ព្រៃហើយគេមកទិញ នៅទីនេះតាមផ្ទះនៅពេលល្ងាច។ លោកបានថ្លែងថា៖ «ថៅកែគេដើររកទិញតាមផ្ទះហើយគេបាញ់ថ្នាំសម្គាល់ ខ្ញុំមិនដឹងថា មានន័យថា ម៉េចទេ វាជាអក្សរបារាំង។ នៅពេលយប់បន្ទាប់ពីប្រមូលឈើអស់ទើបគេដឹកចេញពីភូមិ»។
លោកឲ្យដឹងទៀតថា ពលរដ្ឋគ្របទុកឈើនៅតាមផ្ទះរបស់ពួកគេ ហើយនៅពេលល្ងាចឈ្មួញមកដល់ទើបគេប្រមូលថ្លឹង ពុំមានអាជ្ញាធរធ្វើការទប់ស្កាត់នោះទេ ដោយសារតំណាងរបស់ក្រុមហ៊ុន ទ្រី ភាព បានរត់ការបង់លុយឲ្យពួកគេរួចទៅហើយ តាំងពីមន្ត្រីថ្នាក់លើរហូតដល់ថ្នាក់មូលដ្ឋាន ប៉ុន្តែពលរដ្ឋទាំងនោះត្រូវតែបង់ឲ្យប៉ូលិសរដ្ឋបាល ២ ម៉ឺនរៀលក្នុងឈើមួយគោយន្ត។ លោកបានថ្លែងថា៖ «ចាប់តាំងពីមុនបោះឆ្នោតនិងក្រោយលទ្ធផលបោះឆ្នោត ខាងក្រុមហ៊ុនរបស់លោកឧកញ៉ា ទ្រី ភាព បានឲ្យតំណាងរបស់គេម្នាក់ឈ្មោះ ស្រ៊ាង ម៉េង ចុះមកឃុំនេះ ដើម្បីលើកទឹកចិត្តឲ្យពលរដ្ឋនៅក្នុងភូមិចូលទៅកាប់ព្រៃដើម្បី លក់ឲ្យពួកគេ»។
លោកថ្លែងថា សព្វថ្ងៃនេះគឺដោយសារតែចាញ់នូវឥទ្ធិពលប្រាក់ដុល្លារ ធ្វើឲ្យពលរដ្ឋដែលធ្លាប់តែការពារព្រៃបានក្លាយទៅជាអ្នកបំផ្លាញ ព្រៃអស់ទៅហើយ លោកស្តាយឈើមែនទែន ប៉ុន្តែមិនដឹងរកវិធីសាស្ត្រណាទប់ស្កាត់បានបើពឹងទៅអាជ្ញាធរគេ អត់អើពើ។ ឯឈើដែលដាក់គរនៅតាមភូមិគេទិញមួយម៉ែត្រគុបមួយលានជាប្រភេទឈើ ធ្នង់។ លោកថា៖ «បច្ចុប្បន្ននេះ ពលរដ្ឋរកស៊ីឈើស្រួលជាងមុន»។
នៅខណៈដែលឈើត្រូវបានពង្រាយនៅតាមព្រៃដោយមានសរសេរជាអក្សរពណ៌ ក្រហមថា KM និង AF នោះ លោក ឈាង វុទ្ធី ដែលជាសកម្មជនការពារព្រៃឈើនៅតែប្រកាន់ជំហរប្រឆាំងជាមួយឈ្មួញ បំផ្លាញព្រៃឈើបានថ្លែងថា៖ «បច្ចុប្បន្ននេះឈើស្ទើរតែអស់ទៅហើយដូច្នេះ បើគេទៅព្រៃជួបគល់យកគល់ ជួបឈើយកឈើនេះជាយុទ្ធសាស្ត្រចុងក្រោយរបស់ក្រុមហ៊ុនក្នុងការ បំផ្លាញឈើឲ្យអស់នៅ ខេត្តព្រះវិហារ»។ លោកបន្តថា៖ «គេបើកដៃឲ្យរកតាមចិត្តគេមិនបានចាប់ចងទេ ព្រោះក្រុមហ៊ុនគេបង់ឲ្យសមត្ថកិច្ច គេរកស៊ីដូចរកស៊ីដំឡូងអ៊ីចឹង»។
លោកថា ឈើចាប់ផ្តើមស្បើយពីចុង ឆ្នាំ២០១៣ មក ហើយខ្លាំងមែនទែនគឺនៅអំឡុងពេលបោះឆ្នោត។ លោកថា៖ «នៅក្នុងភូមិនីមួយៗយ៉ាងហោចណាស់ក៏មានរណាររ៉ៃ ១០០ ទៅ ២០០ គ្រឿងដែរ។ នៅទីនេះលុះត្រាតែគ្មាន ទ្រី ភាព និង ស្រ៊ាង ម៉េង ទើបព្រៃនៅគង់វង្ស»។
ជាមួយនឹងគំនរឈើធ្នង់រាប់រយគុបនៅខាងមុខផ្ទះដែលមានបាញ់ ថ្នាំក្រហមសម្គាល់របស់ក្រុមហ៊ុនហើយនោះ លោក ផា ដូន ដែលបានប្រកបរបរជាអ្នកកាប់ឈើនៅក្នុងតំបន់ ស្រែវាល អស់រយៈពេល ៤ឆ្នាំ មកហើយ បានថ្លែងថា ពីមុនគេកាប់គររាប់ពាន់កំណាត់រាប់ពាន់ដើម បច្ចុប្បន្ននេះលោកបានចាប់ផ្តើមបង្វែរទៅកាប់ឈើនៅកន្លែងថ្មីនៅ ខេត្តស្ទឹងត្រែង តាមក្រុមហ៊ុន បន្ទាប់ពីទីតាំងឈើនៅក្នុងតំបន់ជិតអស់។ លោកបានថ្លែងថា៖ «ឈើនៅទីនេះអស់ហើយស្ទើរតែជីកគល់ទៀតទៅហើយ វាអស់ទៅហើយ រដ្ឋាភិបាលមិនដឹងប្រកែកថា គ្មានការកាប់ឈើម៉េចទេ គេកាប់អស់ហើយហ្នឹង»។
សកម្មភាពការដឹកជញ្ជូនឈើបានចាប់ផ្តើមស្ទូចឈើដែលលាក់ទុកនៅ ក្នុងព្រៃនៅពេលល្ងាចដែលមានរថយន្តយីឌុបធំៗនិងរថយន្តស្ទូចរបស់ ក្រុមហ៊ុន ឧកញ៉ា ទ្រី ភាព ស្ថិតនៅក្នុង ស្រុកសង្គមថ្មី ចំណែកឯនៅក្នុង ស្រុកជ័យសែន និងស្រុកឆែប បានចាប់ផ្តើមនាពេលព្រឹកព្រលឹម និងដើរប្រមូលទិញពីផ្ទះនៅពេលល្ងាច។ នៅខណៈដែលរថយន្តផ្ទុកទៅដោយឈើ ហើយជាប់ផុងមិនអាចទៅរួចដែលមានមនុស្សមួយក្រុមកំពុងព្យាយាម សណ្តោងនិងរុញឲ្យទៅមុខ បុរសម្នាក់ដែលបដិសេធមិនបញ្ចេញឈ្មោះនិយាយទាំងសភាពរញីរញ័រ ដោយលើកទូរស័ព្ទតេទៅលោក ម៉េង ទាំងញើសជោកខ្លួនបានប្រាប់ឲ្យដឹងថា ឈើនោះគឺជារបស់លោក ជ្រុយ ដែលមានឈ្មោះពេញថា លី គឹមឈួង ជាអតីតបម្រើការឲ្យផ្នែកចារកម្ម។ លោកថ្លែងថា៖ «ឈើនេះ របស់បង ជ្រុយ ហើយយើងដឹកយកទៅដាក់ឲ្យក្រុមហ៊ុន ឧកញ៉ា ទ្រី ភាព ខ្ញុំគ្រាន់តែដឹកឲ្យគេប៉ុណ្ណោះ ខ្ញុំមិនដឹងថាគេឲ្យខ្ញុំប៉ុន្មាននោះទេ»។
លោក ឈឹម សាវុធ នាយកប្រតិបត្តិអង្គការការពារធនធានធម្មជាតិបានថ្លែងថា៖ «បច្ចុប្បន្ននេះយុទ្ធសាស្ត្ររបស់ក្រុមហ៊ុន ឧកញ៉ា ទ្រី ភាព បំផ្លាញឈើដែលនៅចុងក្រោយក្នុង ខេត្តព្រះវិហារ នេះតែម្តងដោយបានឲ្យមេការដើរបំផុសបំផុលពលរដ្ឋឲ្យចូលព្រៃកាប់ ឈើលក់ឲ្យខ្លួនមុននិងខ្លួនរើទៅកាន់ទីតាំងថ្មីស្ថិតក្នុង ខេត្តស្ទឹងត្រែង»។ នៅក្នុង ស្រុកឆែប ដែលស្ថិតនៅក្នុង ភូមិឆែប២ ត្រង់ចំណុចបំបែកទៅ ដងផ្លិត មានឈ្មោះ ឈឿន សំណាង ជាមេឃ្លាំងធំ ហើយអ្នកដើរប្រមូលទិញនៅក្នុង ស្រុកសង្គមថ្មី និង ជ័យសែន មានឈ្មោះ ហេង គង់ និង តុប វីរ៉ាដា លី គឹមឈួង ហៅ ជ្រុយ ដែលមានស្លាកលេខឈើ KM ប៉ុន្តែពួកគេប្រមូលយកមកដាក់នៅក្នុងឃ្លាំងនៅ ឆែប ទាំងអស់ចំណែកលោក ស្រ៊ាង ម៉េង ជាអ្នករត់ការទូទៅ ហើយអ្នកដែលមើលការខុសត្រូវទូទៅរបស់ក្រុមហ៊ុន ឧកញ៉ា ទ្រី ភាព នៅ ខេត្តព្រះវិហារ គឺលោក អ៊ុក គឹមសាន្ត អតីតប្រធានរដ្ឋបាលព្រៃឈើ ខេត្តពោធិ៍សាត់។
លោកបានថ្លែងឲ្យដឹងទៀតថា បច្ចុប្បន្ននេះស្ថានភាពព្រៃឈើកំពុងតែធ្ងន់ធ្ងរទៅៗតាមរយៈការ ញុះញង់ឲ្យពលរដ្ឋចេញទៅកាប់ឈើដូចហែកឋិន ហើយ វាអាចនឹងបាត់បង់ព្រៃឈើទាំងស្រុងក្នុងរយៈពេល ២ខែ ខាងមុខទៀត នេះប្រសិនបើពុំមានការទប់ស្កាត់ដូចសព្វថ្ងៃ។ លោកថា៖ «បើអ្នកណាបដិសេធថា គ្មានបទល្មើសព្រៃឈើមកជួបខ្ញុំ ខ្ញុំនាំទៅកន្លែងដែលប្រព្រឹត្តបទល្មើសនេះ។ បច្ចុប្បន្នគេកំពុងតែសម្រុកកាប់នៅក្នុងភ្នំ ត្បែង និង ព្រៃព្រះរកា ហើយគេក៏បានបន្តទៅ ខេត្តស្ទឹងត្រែង ដើម្បីបង្ហើយព្រៃឈើនៅក្នុងស្រុកខ្មែរតែម្តង»។
កាលពី ថ្ងៃ ទី២២ ខែកុម្ភៈ ឆ្នាំ២០១៣ លោកនាយករដ្ឋមន្ត្រី ហ៊ុន សែន បានចុះហត្ថលេខាលើបទបញ្ជា ០២ បប ស្តីពីវិធានការបង្ការ ទប់ស្កាត់ និងបង្រ្កាបការកាប់ការដឹកជញ្ជូន ការប្រមូល ការស្តុកទុក និងការនាំឈើគ្រញូងចេញ ដោយសម្រេចលើ ៩ ចំណុចដែលនៅក្នុងចំណុច ទី១ ក្នុងកថាខណ្ឌ ទី២ បានលើកឡើងថា ករណីមានការឆ្លងដែនខុសច្បាប់ក្នុងភូមិសាស្ត្រឈរជើងរបស់អង្គភាព ណាមួយ មេបញ្ជាការអង្គភាពនោះត្រូវមានការទទួលខុសត្រូវចំពោះមុខរាជ រដ្ឋាភិបាល។
ទាក់ទិននឹងបទបញ្ជានេះ លោក ឈឹម សាវុធ បានថ្លែងថា រដ្ឋាភិបាលគ្មានឆន្ទៈក្នុងការបង្ក្រាបបទល្មើសព្រៃឈើនោះទេ ប្រសិនបើគេមានឆន្ទៈបង្ក្រាបវាគ្មានការលំបាកនោះទេដោយគ្រាន់តែ អនុវត្តច្បាប់ព្រៃឈើ មិនចាំបាច់ចេញបទបញ្ជានោះទេ។ លោកថា៖ «ដោយសារតែ ការអស់សង្ឃឹមនៅក្នុងការទប់ស្កាត់បទល្មើស ទើបពលរដ្ឋនាំគ្នាកាប់ឈើលក់ឲ្យក្រុមហ៊ុនដោយគាត់យល់ថា ប្រសិនបើពួកគាត់មិនកាប់ក៏ពួកឈ្មួញទាំងអស់នោះកាប់អស់ដែរ»។
យោងតាមរបាយការណ៍រូបភាពផ្កាយរណប ដែលចេញកាលពី ខែធ្នូ ឆ្នាំ២០១៣ ផែនទីដែលមានលក្ខណៈចលនាគេហទំព័រ Open Development Cambodia (ODC) បានបង្កើតពីរូបភាពផ្កាយរណប ណាស្សា (NASA) បានបង្ហាញលម្អិតអំពីការបំផ្លាញខ្លាំងក្លាទៅលើព្រៃឈើរបស់ ប្រទេសកម្ពុជា ជាការបំផ្លាញដែលបានកើនឡើងយ៉ាងខ្លាំងក្នុងរយៈកាល ៥ ឆ្នាំចុងក្រោយនេះ។ គេហទំព័រ ODC បានឲ្យដឹងថា ការវិភាគរូបភាពផ្កាយរណបបង្ហាញថា នៅក្នុង ឆ្នាំ១៩៧៣ ប្រហែល ៧២,១១ ភាគរយនៃ ប្រទេសកម្ពុជា ត្រូវបានគ្របដណ្តប់ដោយព្រៃឈើ។ រូបភាពថ្មីៗបានបង្ហាញថា គម្របព្រៃឈើបច្ចុប្បន្នមានតិចទៅៗគឺចំនួន ៤៦,៣៣ ភាគរយ ដោយរួមបញ្ចូលទាំងចម្ការកៅស៊ូផង។
លោក សាវុធ បានថ្លែងឲ្យដឹងទៀតថា បើងាកទៅមើលមន្ត្រី រដ្ឋបាលព្រៃឈើឯណេះវិញគឺគ្មានវិធានការអ្វីទប់ស្កាត់ទាំងអស់ ក្រៅពីជួយលាក់បាំងបទល្មើសហើយសូម្បីតែការិយាល័យរដ្ឋបាលព្រៃឈើ ស្រុកជ័យសែន ក៏ជាកន្លែងស្តុកឈើរបស់ក្រុមហ៊ុន ឧកញ៉ា ទ្រី ភាព ដែរ។ លោកថា៖ «ខ្ញុំសូមឲ្យអស់លោកឧកញ៉ា ឈប់ទៅល្មមឈប់បំផ្លាញប្រទេសខ្លួនឯងទៀតហើយ ទុកទៅព្រៃដែលនៅសេសសល់ប៉ុន្មាននោះទៅ អស់លោកក៏មានទ្រព្យសម្បតិ្តល្មមស្កប់ស្កល់ហើយ»។
លោក ឈឹម សុខស៊ីវត្ថា ប្រធានរដ្ឋបាលព្រៃឈើ ស្រុកជ័យសែន បានមានប្រសាសន៍យ៉ាងខ្លីថា ចំពោះក្រុមហ៊ុនរបស់លោកឧកញ៉ា ទ្រី ភាព ប្រមូលទិញឈើពីប្រជាជននោះ គឺពុំមានអាជ្ញាប័ណ្ណនោះទេ។ លោកបានបដិសេធមិនផ្តល់ការអត្ថាធិប្បាយច្រើននោះទេ។
លោក សាត់ យ៉ន អធិការប៉ូលិស ស្រុកជ័យសែន បានថ្លែងឲ្យដឹងថា លោកពុំដែលដឹងថាមានមន្ត្រីសមត្ថកិច្ចរបស់លោកស្ទាក់យកលុយពី ប្រជាពលរដ្ឋដែលចូលទៅកាប់ឈើនោះទេ ហើយក៏ពុំដែលមានខាងក្រុមហ៊ុនណាគេមកទំនាក់ទំនងដើម្បីសហការជាមួយ ពួកលោកដែរ។ លោកបានបន្តទៀតថា៖ «យើងបានធ្វើការហាមឃាត់ពួកគាត់កុំឲ្យទៅកាប់ឈើដែរតែយើងហាម មិនឈ្នះ»។
លោក ឧកញ៉ា ទ្រី ភាព និងលោក អ៊ុក គឹមសាន្ត តំណាងឲ្យក្រុមហ៊ុន ទ្រី ភាព នៅ ខេត្តព្រះវិហារ ពុំអាចទាក់ទងដើម្បីធ្វើការអត្ថាធិប្បាយបានទេ។
រីឯលោក ឆេង គឹមស៊ុន ប្រតិភូរដ្ឋាភិបាល ទទួលបន្ទុករដ្ឋបាលព្រៃឈើពុំអាចទាក់ទងដើម្បីធ្វើការអត្ថាធិប្បាយបានទេ។
យោងតាមរបាយការណ៍របស់ក្រុមកិច្ចការពិសេសសិទ្ធិមនុស្ស Ouch Leng ដែលបានចេញផ្សាយកាលពីចុង ឆ្នាំ២០១៣ បានរកឃើញឃ្លាំងស្តុកឈើប្រណីតចំនួន ១៤ កន្លែង និងអាជ្ញាប័ណ្ណទិញឈើក្នុងតំបន់ដីសម្បទានសេដ្ឋកិច្ចចំនួន ២៧ នៅតាមខេត្តចំនួន ១២ ព្រមទាំងមានក្រុមហ៊ុនសាខាដែលទទួលបានដីសម្បទានសេដ្ឋកិច្ចចំនួន ១៥ នៅតាមខេត្តចំនួន ១០ ដែលមានផ្ទៃដីសរុបជិត ៧ ម៉ឺនហិកតា។
ផែនការកាប់ឈើក្រោមស្លាកអភិវឌ្ឍន៍របស់ក្រុមហ៊ុនលោក ទ្រី ភាព បានប៉ះទង្គិចដល់ការរស់នៅរបស់ប្រជាពលរដ្ឋចំនួនជិត ១ ៥០០ គ្រួសារ និងប៉ះពាល់ដល់តំបន់ការពារធនធានធម្មជាតិនៃដែនជម្រកសត្វ និងឧទ្យានជាតិចំនួន ២០ កន្លែង។ ចំណែកឯ អង្គការ Global Witness កាលពី ឆ្នាំ២០០៨ ថា លោកឧកញ៉ា ទ្រី ភាព ជាអ្នកនៅពីក្រោយក្រុមហ៊ុនរបស់ វៀតណាម មួយឈ្មោះ (Hongfu) ដែលរកស៊ីកាប់បំផ្លាញព្រៃឈើរាប់ម៉ឺនហិកតា។ របាយការណ៍នោះក៏បានឲ្យដឹងផងដែរថា លោកឧកញ៉ា ទ្រី ភាព គឺជាមនុស្សដែលមានអំណាច និងជាមនុស្សពូកែរកលុយឲ្យគណបក្សប្រជាជនកម្ពុជា៕
No comments:
Post a Comment
Thank so much for your comments or idea
please contact us for more detail report
ouchleng@gmail.com
855-16705 567