ពេលបង្ក្រាបឈើគ្រញូងឆ្លងកាត់ខេត្តកំពង់ធំលេចព័ត៌មានថាមន្ត្រីប៉េអឹមឈ្មោះ យី សំអូន ជួយរត់ការ
កំពង់ធំ ៖ បទល្មើស
ឈើគ្រញូងដែលរត់ការដោយមន្ត្រីប៉េអឹមម្នាក់ដែលឈរជើងនៅ
ខេត្តកំពង់ធំឈ្មោះ យី សំអូន
បាននិងកំពុងធ្វើឲ្យសមត្ថកិច្ចរដ្ឋបាលព្រៃឈើកំពង់ធំឈឺក្បាលមិនតិចទេ
ហើយសកម្មភាពនេះកំពុងបន្តកើតមានជារៀងរាល់ថ្ងៃបើទោះបីជា
សមត្ថកិច្ចមួយចំនួនបានព្យាយាមទប់ស្កាត់ក៏ដោយ។ ជាក់ស្តែង
កាលពីវេលាម៉ោង ៩ ព្រឹកថ្ងៃទី២៨ ខែសីហា ឆ្នាំ២០១២
នៅត្រង់ចំណុចភូមិម្នាវ សង្កាត់ស្រយូវ ក្រុងស្ទឹងសែន
ជាប់នឹងព្រំប្រទល់ស្រុកសន្ទុក ខេត្តកំពង់ធំនោះ
សមត្ថកិច្ចរដ្ឋបាលព្រៃឈើ
បានដេញស្ទាក់ឃាត់បានរថយន្តដឹកឈើគ្រញូង២គ្រឿងដែលមានប្រភពចេញពី
ខេត្តព្រះវិហារឆ្លងកាត់ខេត្តកំពង់ធំឆ្ពោះទៅខេត្តកំពង់ចាមស្រាប់តែ
លេចឈ្មោះ យី សំអូន ជាអ្នកចេញមុខរត់ការ។
មន្ត្រីរដ្ឋបាលព្រៃឈើកំពង់ថ្មម្នាក់បានប្រាប់វរជនខ្មែរថា
រថយន្តពីរគ្រឿងដែលដឹកឈើគ្រញូងនេះគឺមួយគ្រឿងម៉ាកឡុចស៊ីស៤៧០
ពណ៌ខ្មៅ ពាក់ស្លាកលេខ ភ្នំពេញ ២I-៩៨០៨ ចង្កូតឆ្វេង
និងមួយគ្រឿងទៀតម៉ាកឡង់រ៉ូវ័រ ពណ៌ខ្មៅ។ លោក សុទ្ធ ម៉ារី
នាយផ្នែករដ្ឋបាលព្រៃឈើកំពង់ថ្មបាននិយាយតាមទូរស័ព្ទថា
រថយន្តឡង់នេះត្រូវអូសមករក្សាទុកនៅផ្នែកកំពង់ថ្ម
និងរថយន្តឡុចស៊ីសប្រគល់ឲ្យផ្នែកស្ទោងដើម្បីចាត់ការតាមផ្លូវ
ច្បាប់។ លោកបានបញ្ជាក់ទៀតថា
ចំពោះឈើគ្រញូងទាំងនេះពុំទាន់បានវាស់វែងជាផ្លូវការនៅឡើយទេ។
ប្រភពព័ត៌មាន
មាត់ចាបមាត់ប្រៀបពីសមត្ថកិច្ចដែលឈរជើងនៅតាមដងផ្លូវជាតិលេខ៦៤
និងលេខ៦ក្នុងភូមិសាស្ត្រខេត្តកំពង់ធំបានឲ្យដឹងថា
ឈ្មួញដឹកឈើគ្រញូងនេះឈ្មោះ លី
ហើយមានមន្ត្រីប៉េអិមខេត្តកំពង់ធំម្នាក់ចេញមុខជួយរត់ការគឺមាន
ឈ្មោះ យី សំអូន ។
ប្រភពខាងលើបានបញ្ជាក់ថា ឈ្មោះ យី សំអូន
នេះបានរត់ការប៉ាវផ្ដាច់សម្រាប់ការដឹកជញ្ជូនឈើឆ្លងកាត់
ខេត្តកំពង់ធំហើយមន្ត្រីតូចតាចនៅតាមដងផ្លូវទាំងពីរខ្សែនេះគឺពុំ
បានទទួលមួយកាក់មួយសេនពីឈ្មោះ យី សំអូន ឡើយ។
ប៉ុន្តែទោះជាយ៉ាងណាក្ដីលោក យី សំអូន បានបដិសេធថា
លោកពុំបានប្រព្រឹត្តបែបនេះទេ
ហើយនេះជារឿងរបស់អ្នកផ្សេងបានស៊ីបានចុកមកទម្លាក់កំហុស
និងមួលបង្កាច់ដាក់គាត់។ ទោះជាយ៉ាងណាក៏ដោយលោក យី សំអូន
ត្រូវគេស្គាល់ថាជាជើងខ្លាំងមួយរូបក្នុងការរត់ការសម្រួលក្បួនឈើ
គ្រញូងឲ្យក្រុមឈ្មួញមួយចំនួនដ៏មានឥទ្ធិពលផងដែរ៕
