រដ្ឋមន្ត្រីបរិស្ថាន៖ បើអឺរ៉ុប ឈប់ទិញស្ករអំពៅពីកម្ពុជា ប្រៀបដូចជា ផ្តាច់មុខរបររបស់ប្រជាពលរដ្ឋក្រីក្រកម្ពុជា
ក្នុងសន្និសីទកាសែត នាព្រឹកថ្ងៃពុធនេះ លោករដ្ឋមន្ត្រី សាយ សំអាល់ បានបញ្ជាក់ថា “ខ្ញុំបានជួបជាមួយអង្គទូតមួយចំនួន នៅពេលដែលគាត់ហៅអំពៅ ជាអំពៅឈាម។ ជាការបំផ្លាញចោលមួយនូវឧស្សាហកម្មមួយ។ ប្រជាជននៅឱរ៉ាល់នៅខែឧសភា បានទៅឡើងកាប់ឈើ ជាទំលៀមទំលាប់របស់ពួកគាត់។ ពេលមានឧស្សាហកម្មអំពៅនេះដើរ បងប្អូនទាំងអស់នោះ អាចមករការងារធ្វើបាន ជាមួយនឹងចំការអំពៅ ជាមួយនឹងរោងចក្រអំពៅ និងធ្វើពាណិជ្ជកម្មលើស្ករអំពៅ”។
លោករដ្ឋមន្ត្រី សាយ សំអាល់ បន្តថា “យើងត្រូវជម្នះថា ឧស្សាហកម្មណាដែលជួយរការងារផ្តល់ការងារឲ្យប្រជាជនយើងធ្វើ ជួយដល់សេដ្ឋកិច្ចប្រទេសយើង យើងត្រូវតែជម្នះការពារឲ្យបាន។ ប្រសិនបើបំផ្លាញចោលឧស្សាហកម្មអំពៅនេះចោល ប្រជាជនប្រមាណពាន់នាក់នោះទៅរកការងារឯណាបានធ្វើ ហើយខឿនឧស្សាហកម្មមួយត្រូវបំផ្លាញចោលដោយសាររឿងនយោបាយ យើងត្រូវគិតយ៉ាងម៉េច។ យើងដឹងហើយនៅចំការអំពៅមានទំនាស់ ប៉ុន្តែយើងអង្គុយទល់មុខគ្នាចរចាគ្នា ចាំបាច់អីបំផ្លាញឧស្សាហកម្មអំពៅដែលយើងទើបតែចាប់កកើតឡើង”។
ការលើកឡើងរបស់លោករដ្ឋមន្ត្រីដូច្នេះ បានធ្វើឡើង ខណៈពេលប្រជាពលរដ្ឋមួយចំនួន នៅឃុំជីខលើ ស្រុកស្រែអំបិល ខេត្តកោះកុង និងប្រជាពលរដ្ឋនៅឃុំអមលាំង ស្រុកថ្ពង ខេត្តកំពង់ស្ពឺ កើតមានបញ្ហាដីធ្លី យូរឆ្នាំមក ជាមួយនឹងក្រុមហ៊ុនឯកជន ដែលទទួលបានដីសម្បទានសេដ្ឋកិច្ច ពីរដ្ឋាភិបាល សម្រាប់ដាំអំពៅ ធ្វើស្ករស។
ករណីជម្លោះនៅខេត្តកោះកុង នឹងត្រូវតុលាការនៅប្រទេសអង់គ្លេស ដែលស្ថិតក្នុងចំណោមប្រទេសអឺរ៉ុប បើកសវនាការ ជំនុំជម្រះលើរឿងក្តី ប្រឆាំងនឹងក្រុមហ៊ុនស្ករសអង់គ្លេស ឈ្មោះ Tate & Lyle។ ក្រុមហ៊ុន Tate & Lyle ដែលទទួលសិទ្ធិទិញស្ករស ពីក្រុមហ៊ុនផលិតស្ករស នៅខេត្តកោះកុង។ បណ្តឹងនោះ ត្រូវបានប្រជាសហគមន៍ ក្រោមការជ្រោមជ្រែងពីមេធាវីបរទេស បានដាក់ពាក្យប្តឹង ដោយសំអាងថា ក្រុមហ៊ុនស្ករសនៅខេត្តកោះកុង រំលោភលើដីរបស់ប្រជាពលរដ្ឋ។ ប្រជាពលរដ្ឋ បានប្រសិទ្ធិនាមផលិតផលស្ករសនោះ ថាជា ស្ករឈាម៕ ប្រភព ៖ CEN