ក្រុមហ៊ុន ស៊ូកាគូ
លក់ដីបឹងកក់បន្តទៅឲ្យ HLH
របស់ សិង្ហបុរី
Tue, 24 June 2014
ភ្នំពេញៈ ក្រុមហ៊ុនកាន់កាប់គម្រោងអភិវឌ្ឍន៍តំបន់
បឹងកក់ ស៊ូកាគូ បានលក់ដីទំហំប្រមាណ
១,៣
ហិកតា ដែលកំពុងមានជម្លោះទៅឲ្យក្រុមហ៊ុនបុត្រសម្ព័ន្ធ
HLH Group ដែលបានចុះបញ្ជីក្នុងផ្សារហ៊ុន
សិង្ហបុរី។ នេះបើតាមការប្រកាសរបស់ក្រុមហ៊ុន
HLH Group នៅលើគេហទំព័រផ្សារហ៊ុនរបស់
ប្រទេសសិង្ហបុរី។
ក្រុមហ៊ុន D’Lotus Development ជាបុត្រសម្ព័ន្ធនៃក្រុមហ៊ុន
HLH Group បាន
ទិញដីមួយកន្លែងនៅតំបន់បឹងកក់ សង្កាត់ស្រះចក ខណ្ឌដូនពេញ ក្នុងតម្លៃប្រមាណ
១៤,៩
លានដុល្លារកាលពីថ្ងៃ ទី១៩ ខែមិថុនា
ក្នុងបំណងអភិវឌ្ឍទីតាំងនេះឲ្យទៅជាតំបន់ពាណិជ្ជកម្មនិងផ្សារ ទំនើប។
នេះបើតាមសេចក្តីប្រកាសរបស់ HLH។
សេចក្តីប្រកាសចេញផ្សាយថ្ងៃ ទី២០
មិថុនា សរសេរថា៖ «ក្រុមហ៊ុន D’Lotus Development គ្រោងនឹងអភិវឌ្ឍឲ្យមានជាអគារការិយាល័យ
ខុនដូ បែបប្រណីត
ភោជនីយដ្ឋាន បារ៍ និងហាងលក់ទំនិញនៅលើទីតាំងនោះ»។
បន្ទាប់ពីបានចាក់ខ្សាច់បំពេញ
បឹងកក់ ដែលមានទំហំប្រមាណ ៩០ ហិកតា
និងបណ្តេញប្រជាពលរដ្ឋឲ្យចាកចេញពីតំបន់នោះរួចមក ក្រុមហ៊ុនបានហ៊ុមព័ទ្ធដីនៅតំបន់នោះជាកម្មសិទិ្ធ បើទោះបីជាមានការតវ៉ាពីប្រជាពលរដ្ឋក្នុងដីជម្លោះជាច្រើនឆ្នាំ ក៏ដោយ។
កាលពី ឆ្នាំ២០០៧
សាលារាជធានីភ្នំពេញបានយល់ព្រមជួលដី បឹងកក់ រយៈពេល ៩៩ ឆ្នាំជាមួយលោក ឡាវ ម៉េងឃីន
ព្រឹទ្ធសភាគណបក្សប្រជាជនកម្ពុជា
និងជាម្ចាស់ក្រុមហ៊ុន ស៊ូកាគូ ដើម្បីអភិវឌ្ឍលើដី បឹងកក់
១៣៣ ហិកតាក្នុងតម្លៃ
៧៩ លានដុល្លារ។ ភ្លាមៗបន្ទាប់ពីក្រុមហ៊ុនបានចាប់ផ្ដើមចាក់ដីបំពេញបឹងនេះ ហើយអ្នករស់នៅទីនោះបានចាប់ផ្ដើមចាកចេញ។ ក្រុមសិទ្ធិមនុស្សនិយាយថា
ការអភិវឌ្ឍនេះបានប៉ះពាល់ប្រជាជនជាង ៤ ០០០ គ្រួសារ។
បន្ទាប់ពីការសម្រេចចិត្តដោយធនាគារពិភពលោកកាលពី
ឆ្នាំ២០១១ ដើម្បីផ្អាកការផ្ដល់កម្ចីដល់
កម្ពុជា រហូតដល់ដីមានជម្លោះត្រូវបានដោះស្រាយរួច រដ្ឋាភិបាលបានចេញអនុក្រឹត្យផ្ដល់ដី
១២,៤៤ ហិកតាឲ្យដល់គ្រួសារដែលមានការកាន់កាប់ស្របច្បាប់នៅក្នុងការ អភិវឌ្ឍនេះ។
ក្រុមសិទ្ធិមនុស្សបានអះអាងកាលពីម្សិលមិញថា នៅមានប្រជាពលរដ្ឋជាង ៤០ គ្រួសារកំពុងរង់ចាំកិច្ចព្រមព្រៀងស្ដីពីការផ្តល់ដី។
ក្នុងចំណោមដីដែលនៅសល់នៅតែស្ថិតនៅក្នុងកណ្ដាប់ដៃរបស់ក្រុមហ៊ុន
ស៊ូកាគូ ដដែល។
លោក សៀ ភារម្យ ប្រធានអង្គការក្រុមការងារពិសេសសិទ្ធិលំនៅឋានថ្លែងកាលពីម្សិលមិញ ថា៖
«ក្រុមហ៊ុន
ស៊ូកាគូ ប្រហែលជាអាចលក់ដីក្នុងដី ១២,៤៤ ហិកតានោះ
ព្រោះគាត់មានប្លង់កម្មសិទ្ធិ។ ពេលដែលសម្តេច ហ៊ុន សែន ចេញអនុក្រឹត្យប្រទានដីឲ្យប្រជាពលរដ្ឋចំនួន
១២,៤៤ ហិកតាឲ្យប្រជាពលរដ្ឋនោះ
អ្នកភូមិបានឃើញមានឈ្មោះលោក ឡាវ ម៉េងឃីន ជាម្ចាស់កម្មសិទ្ធិដីចំនួន ២៤
ប្លង់ដែរ នៅពេលគេបិទប្រកាសប្លង់កម្មសិទិ្ធនោះ»។
លោកបន្តថា៖ «បើទោះបីជាគាត់លក់ដីក្នុងប្លង់
១២,៤៤
ហិកតា ឬ ក្នុង
១១៤,៤១
ហិកតាគឺសុទ្ធតែមិនត្រឹមត្រូវតាមច្បាប់ទាំងអស់។ គាត់ចំណេញច្រើនណាស់ ខណៈការផ្តល់សំណងទៅកាន់អ្នកដែលរងគ្រោះមានតម្លៃត្រឹមតែ
៨៥០០ ដុល្លារហ្នឹង»។
លោក ចាន់ សុវេត
មន្រ្តីជាន់ខ្ពស់នៃអង្គការសិទ្ធមនុស្ស អាដហុក ក៏បានឲ្យដឹងដែរថា៖ «នៅក្នុងក្របខ័ណ្ឌ វិនិយោគ ឬ ការខ្ចី ភាគីម្ខាងមិនអាចជួល
ឬ លក់បន្តទៅឲ្យភាគីម្ខាងផ្សេងទៀតទេ។ សូម្បីក្រុមហ៊ុនដែលទទួលបានដីសម្បទានសេដ្ឋកិច្ចហើយនោះទៅជួល ក្រុមហ៊ុនមួយផ្សេងឲ្យធ្វើជំនួសនោះក៏មិនបានដែរ គឺមិនសមស្របតាមគោលការណ៍នោះទេ»។
លោកបន្ថែមថា៖ «ដីនេះគាត់ជួលពីរដ្ឋាភិបាល។ គាត់មិនមានសិទ្ធលក់ទេ ព្រោះនេះជាដីកម្មសិទិ្ធឯកជនរបស់រដ្ឋាភិបាល។ ប្រសិនបើគាត់ជួលពីរដ្ឋាភិបាលហើយយកទៅលក់បន្តទៀតនោះ គឺជាទម្រង់ដែលរំលោភលើកិច្ចសន្យាហើយ»។
អ្នកស្រី ទេព វន្នី
សកម្មជនតំណាងសហគមន៍ បឹងកក់ បានអះអាងថា៖ «លោក ឡាវ ម៉េងឃីន មិនមែនជាជនរងគ្រោះទេ លោកគ្មានសិទ្ធិក្នុងការគ្រប់គ្រងដីរាប់រយឡូត៍ពីដីទំហំ
១២,៤៤ ហិកតានេះទេ
ខណៈជាង ៤០ គ្រួសារគឺនៅតែមិនទាន់ទទួលបានប័ណ្ណកាន់កាប់ដី»។
ទាំងក្រុមហ៊ុន HLH និងក្រុមហ៊ុន
ស៊ូកាគូ បដិសេធមិនធ្វើអត្ថាធិប្បាយទេកាលពីម្សិលមិញ៕
