Cambodia Human Rights Task Forces: Luxurious wood transport in Kratie

ជំនាញរដ្ឋបាលព្រៃឈើស្វែងរកជនជាម្ចាស់ឈើប្រណិតជាង៣ម៉ែត្រគូបដើម្បីកសាងសំណុំរឿងបញ្ជូនទៅតុលាការ

ដោយ ៖ ស៊ាងឡាយ|ថ្ងៃទី 29 មេសា 2014 ម៉ោង 17:03:29

ខេត្តក្រចេះ ៖ សំណុំរឿងឈើប្រណីតធ្នង់ខុសច្បាប់ចំនួន៣០កំណាត់ស្មើនឹងជាង៣ម៉ែត្រគូបដែលសមត្ថកិច្ចបង្ក្រាបបាននៅបាតទន្លេមេគង្គក្នុងស្រុកសម្បូណ៍ ប៉ែក ខាងលើ រមណីយដ្ឋាន កាំពីនិងអន្លង់ផ្សោតគឺជំនាញរដ្ឋបាលព្រៃឈើកំពុងតែមានវិធាន ការនិងស្រាវជ្រាវរកជនជា ម្ចាស់ឈើដើម្បីកសាងសំណុំរឿងបញ្ជូនទៅតុលាការ នេះបើតាមការអះអាងរបស់មន្ត្រីជំនាញ ។

មេព្រៃ សង្កាត់រដ្ឋបាលព្រៃឈើសណ្តាន់ នៃផ្នែករដ្ឋបាលព្រៃឈើក្រចេះ លោកសេង ស៊ីដារុន បានបញ្ជាក់ថា សំណុំរឿងឈើប្រណីតខុសច្បាប់នេះ គឺមេព្រៃសង្កាត់បានបញ្ជូនសំណុំរឿងមកផ្នែក រដ្ឋបាលព្រៃឈើក្រចេះអស់ហើយ កាលពីថ្ងៃទី២៨ មេសា បន្ទាប់ពីបង្ក្រាបបាននិង កសាង សំណុំរឿងមានរយៈពេល២ថ្ងៃរួចមក ។

គួររំលឹកថា មានឈើប្រណីតប្រភេទធ្នង់មានមុខកាត់តូចធំ គឺត្រូវមេព្រៃឆ្មក់បង្ក្រាបបាន ទាំងព្រឹកថ្ងៃទី២៦ ខែមេសា ខណៈដែល ឈើទាំងនេះ ត្រូវឈ្មួញទុច្ចរិតដឹកជញ្ជូនតាម ទូកតូចធំ មកពន្លិចនៅបាតទន្លេក្រោយភូមិធំ ឃុំសណ្តាន់ ស្រុកសម្បូណ៍។

ឈើទាំងនេះ សុទ្ឋសឹងជាឈើប្រណីត មានតម្លៃថ្លៃ ត្រូវកម្លាំងសមត្ថកិច្ចមុជរាវ រកឃើញនៅបាតទន្លេខាងក្រោយដីឡូត៍ផ្ទះប្រជាពលរដ្ឋចំណុចភូមិ-ឃុំ ខាងលើ ដែលទីតាំងនេះ ត្រូវគេរាយការណ៍ថា ជាប្រភពនៃការផ្តល់ការលាក់ស្តុក និងដឹកជញ្ជូនឈើខុសច្បាប់ ។

ទោះបីជាយ៉ាង ណា ក្នុងសកម្មភាពនៃការ ឃាត់ភ្លាមៗនោះ ស្ថាប័នជំនាញរដ្ឋបាលព្រៃឈើមិនបានបញ្ជាក់ពីអត្តសញ្ញាណ ជនជាម្ចាស់ឈើឬមានវិធានការតាមផ្លូវច្បាប់ទៅដល់ជនជាម្ចាស់ឈើ នេះនៅឡើយទេ។

បើតាមសេចក្តីរាយការណ៍ពីពលរដ្ឋរស់នៅម្តុំនោះបាននិយាយថាសកម្មភាពនៃការដឹកជញ្ជូនឈើព្រណីតនៅចំណុចនេះ បានកើតមានរយៈពេល រាប់សិបខែមកហើយ គឺឈ្មួញ បានដឹកតាមទូកមកច្រាំងទន្លេនិងបានលើកផ្ទេរឡើងរថយន្ត ដោយធ្វើសកម្មភាពកាត់អារ ច្រៀកទាំងយប់ទាំងថ្ងៃថ្លង់ស្ទើរដេកពួនមិនបាន។

ប្រជាពលរដ្ឋ នៅតំបន់នោះបានអះអាងប្រហាក់ប្រហែលគ្នាថា សកម្មភាពនៃការដឹកជញ្ជូនឈើយ៉ាងសកម្មបំផុតនៅលើកំណាត់ ផ្លូវមួយនេះពីស្រុកសម្បូណ៍នាំឆ្ពោះទៅ ស្រុកឆ្លូង តាមទូកនិងរថយន្ត គឺគេស្គាល់ថាជាឈ្មួញឈ្មោះ គន្ធា មានស្រុកកំណើតនៅ ឃុំវឌ្ឍនៈ ស្រុកសម្បូណ៍ ដែល កន្លងមកជនម្នាក់នេះ បានតាំងខ្លួនជាមន្ត្រីកងរាជអាវុធហត្ថ និងបានយកអំណាចនេះមកកាងរបររកស៊ីឈើខុសច្បាប់របស់គេជាហូរហែ ។

ប្រភព ព័ត៌មានបានបញ្ជាក់ទៀតថា កន្លងមកមេឈ្មួញម្នាក់នេះក៏ជាមុខសញ្ញាជាប់ ពាក់ព័ន្ធជាមួយតុលាការលើករណីជំនួញឈើខុសច្បាប់ដែរតែនៅមិនរាងចាល និងករណីគំរាម កំហែងអ្នកកាសែតក្នុងស្រុកមួយចំនួន ក្នុងជម្លោះជំនួញឈើរបស់គេផងដែរ។

មជ្ឈដ្ឋាននានាបានដាក់ការឃ្លាំមើលថា តើមន្ត្រីជំនាញរដ្ឋបាលព្រៃឈើនឹងមាន ចំណាត់រឺវិធានការផ្លូវច្បាប់យ៉ាងណាដល់ជនជាម្ចាស់ឈើរូបនេះ? ខណៈដែល គេដឹងថា ផ្ទះមួយនេះ ជាទីតាំងលាក់និងស្តុកឈើ និងផ្តល់ការដឹកជញ្ជូនឈើអនាធិប្បតេយ្យធំជាង គេក្នុងស្រុកសម្បូណ៍ ដោយមានមេឈ្មួញឈ្មោះ គន្ធាជាអ្នកចេញមុខយ៉ាងចំហនោះ។

លោក ព្រាប សុធារ៉ា នាយផ្នែករដ្ឋបាលព្រៃឈើក្រចេះ បានឲ្យដឹងនៅរសៀលថ្ងៃទី២៩ ខែមេសានេះថា ករណីឈើប្រណីតធ្នង់ជាង៣ម៉ែត្រគូប ដែលកម្លាំងជំនាញ បាន បង្ក្រាបកាលពីថ្ងៃទី២៦ ខែមេសា ពេលនេះកម្លាំងជំនាញកំពុងតែកសាងសំណុំរឿងនិងស្វែងរកជនជា ម្ចាស់ឈើដើម្បីបញ្ជូនទៅតុលាការ។

ដោយឡែកក្រុមអ្នកឃ្លាំមើលពីបទល្មើសព្រៃឈើ បានអះអាងថា កន្លងមកបើស កម្មភាពនៃការបង្ក្រាបឈើខុសច្បាប់គ្រប់ប្រភេទ គឺជនល្មើសជាម្ចាស់ឈើតែងតែរួចខ្លួន ពីសំណាញ់ច្បាប់ខណៈដែល ឈ្មួញទាំងនោះធ្លាប់ផ្តល់លាភសក្ការៈដល់មន្ត្រីជំនាញ ទើបមន្ត្រីជំនាញចាប់ទាំងទើសទាល់ និងកសាងសំណុំរឿងថា ជាសន្និធិព្រៃឈើឫជាឈើ គ្មានម្ចាស់។

មន្ត្រី ជំនាញផ្នែកច្បាប់បានបញ្ជាក់ថា យោងតាមមាត្រាទី៩៨នៃច្បាប់ស្តីពីព្រៃឈើ បានកំណត់ថា ការប្រមូលផល និងអនុផលព្រៃឈើដោយគ្មានលិខិតតអនុញ្ញាតនឹងត្រូវផ្តន្ទាទោសក្រោមបទល្មើសព្រៃឈើថ្នាក់ទី២ គឺត្រូវជាប់ពន្ធនាគារពីទៅ៥ឆ្នាំ និងត្រូវផ្តន្ទាទោសពិន័យជាប្រាក់ពី១០លាន ទៅ១០០លានរៀលរីឯវត្ថុតាងទាំង អស់គឺត្រូវរឹបអូសជាសម្បត្តិរដ្ឋ ៕

CHRTF

Business and Investment Watch Project

Tuesday 29 April 2014

Luxurious wood transport in Kratie

No comments:

Post a Comment

Acticvities

Human Rights Monitoring