ជនជាតិព្នង ដាក់ញត្តិសុំអាជ្ញាធរខេត្តមណ្ឌលគីរី ជួយដោះស្រាយបញ្ហារំលោភបំពានកាប់ព្រៃសហគមន៍
(ថ្ងៃទី 28 មេសា 2014, ម៉ោង 05:21:PM) |
ខេត្តមណ្ឌលគីរី : តំណាងជនជាតិដើមភាគតិចព្នង ជាង១០០នាក់នៅទូទាំងខេត្តមណ្ឌលគីរី បាននាំគ្នាមកដាក់ញត្តិមកសាលាខេត្តមណ្ឌលគីរី ដើម្បីជួយអន្តរាគមន៍ទប់ស្តាប់បទល្មើសព្រៃឈើ ការកាប់ទន្ទ្រានព្រៃឈើ ពីសំណាក់ក្រុមហ៊ុនសម្បទាន កាលពីព្រឹកថ្ងៃទី២៨ខែមេសាឆ្នាំ២០១៤ នៅមុខសាលាខេត្ត។ សាលាខេត្តបានអនុញ្ញាតឲ្យតំណាងជនជាតិព្នង២០នាក់ចូលជួបពិភក្សា និងដោះស្រាយបញ្ហាប្រឈមនិងទំនាស់ ហើយលោកអភិបាលរងខេត្ត បានទទួលយកញត្តិរបស់បងប្អូនជនជាតិព្នងដើម្បីធ្វើការដោះស្រាយជាមួយ ក្រុមហ៊ុន។
លោកឃុន ចាន់រ៉ា រស់នៅភូមិ-ឃុំប៊ូស្រា ស្រុកពេជ្រាដា បានថ្លែងថា ពួកខ្ញុំបានលើកគ្នាទូទាំងខេត្តមណ្ឌលគីរី មកសាលាខេត្តដើម្បីដាក់ញត្តិជូនអាជ្ញាធរខេត្ត ដើម្បីអន្តរាគមន៍ទប់ស្កាត់ការប្រព្រឹត្តបទល្មើសព្រៃឈើ និងការកាប់ទន្ទ្រានយកដីព្រៃសហគមន៍ពីសំណាក់ក្រុមហ៊ុនដីសម្បទាន។ ក្រុមហ៊ុនបានទទួលដីសម្បទានដាំកៅស៊ូ ប៉ុន្តែបានរំលោភចូលក្នុងព្រៃសហគមន៍ជនជាតិដើមភាគតិចព្នង នៅទូទាំងខេត្តមណ្ឌលគីរី។ពាក់ព័ន្ធសំណើរសុំរបស់់បងប្អូន ជនជាតិដើមភាគតិចព្នង ស្នើសុំអាជ្ញាធរខេត្តជូនអន្តរាគមន៍ទប់ស្កាត់បទល្មើស និងការកាប់បំពានយកព្រៃសហគមន៍ ពីសំណាក់ក្រុមហ៊ុននៅខេត្តមណ្ឌលគីរី, លោកយីប លុច អភិបាលរងខេត្តមណ្ឌលគីរី បានប្រសាសន៍ថា បញ្ហានេះយើងទទួលស្គាល់ថា ដាំកៅស៊ូត្រូវតែកាប់ព្រៃខ្លះ ព្រោះថា រាជរដ្ឋាភិបាលបានកំណត់ធ្វើកន្លែងណាជាតំបន់អភិរក្ស កន្លែងណាខ្លះជាតំបន់អភិវឌ្ឍន៍។ នេះជាការចាំបាច់ណាស់ បើមិនធ្វើដូច្នេះទេ ពលរដ្ឋយើងមានការងារណាធ្វើ។ នេះជាទស្សនវិស័យរបស់រាជរដ្ឋាភិបាលកម្ពុជា។ បើសិនជាក្រុមហ៊ុនណារំលោភ ត្រូវតែមានការដោះស្រាយរវាងក្រុមហ៊ុនជាមួយនឹងបងប្អូនឲ្យទទួលបាន សមរម្យ ទើបអាចរស់នៅជាមួយគ្នាបាន។ បញ្ហាដែលពលរដ្ឋលើកឡើងមកនេះ ខ្ញុំនឹងកត់ត្រាយកទៅដោះស្រាយជាមួយក្រុមហ៊ុន។
លោកអភិបាលរង ខេត្តបានបញ្ជាក់ថា ក្រុមហ៊ុនដែលគេកាប់ព្រៃនេះ គឺកាប់ទៅតាមច្បាប់ ដែលអនុញ្ញាតដោយរាជរដ្ឋាភិបាលកម្ពុជា ប៉ុន្តែបើបងប្អូនយើងទៅកាប់ឈើដោយគ្មានការអនុញ្ញាត គឺខុសច្បាប់។ បងប្អូនត្រូវការដីសម្រាប់ធ្វើស្រែ ត្រូវតែធ្វើសំណើមកខេត្ត ហើយខេត្តនឹងធ្វើសំណើទៅរាជរដ្ឋាភិបាលដើម្បីសុំដីជូនបងប្អូន សម្រាប់ធ្វើស្រែ ហើយបងប្អូនអាចទៅធ្វើការជាមួយក្រុមហ៊ុនដើម្បីបានប្រាក់ចំណូលបន្ថែម ។
លោក លុច បានបញ្ជាក់ថា ចំពោះបទល្មើសព្រៃឈើ សមត្ថកិច្ចបានចាប់ជនល្មើសយកមកផ្តន្ទាទោស ហើយពីថ្ងៃនេះតទៅយើងត្រូវតែរួមគ្នាការពារព្រៃឈើ។
លោកសុខ រដ្ឋា មន្ត្រីសមាគមន៍សិទ្ធិមនុស្សអាដហុក បានថ្លែងថា ប្រជាពលរដ្ឋដែលនាំគ្នាមកដាក់ញត្តិនៅសាលាខេត្តមណ្ឌលគីរីនៅព្រឹក នេះ មានជាង១០០នាក់ គឺមានចំនួន៤ស្រុក និងក្រុង១ ស្មើនឹង១០ឃុំ មាន២០ភូមិ។ ពួកគាត់មកតវ៉ានៅថ្ងៃនេះគឺទាមទារឲ្យអាជ្ញាធរខេត្ត មន្ត្រីជំនាញបរិស្ថាន រដ្ឋបាលព្រៃឈើ និងតុលាការ ជួយអន្តរាគមន៍ការពារព្រៃការពារ ព្រៃសហគមន៍ ព្រៃស្រោង ព្រៃដូនតា ព្រៃកប់សព កុំឲ្យមានការកាប់បំផ្លាញពីសំណាក់ក្រុមហ៊ុនដីសម្បទាន។
លោកបានបន្តថា ការឡើងមកតវ៉ារបស់ពួកគាត់នៅថ្ងៃនេះ សង្ឃឹមថា នឹងបានជោគជ័យ៕T/c
លោកឃុន ចាន់រ៉ា រស់នៅភូមិ-ឃុំប៊ូស្រា ស្រុកពេជ្រាដា
លោកសុខ រដ្ឋា មន្ត្រីសមាគមន៍សិទ្ធិមនុស្សអាដហុក
លោកយីប លុច អភិបាលរងខេត្តមណ្ឌលគីរី
No comments:
Post a Comment
Thank so much for your comments or idea
please contact us for more detail report
ouchleng@gmail.com
855-16705 567