ក្រុមហ៊ុន Smart ដាក់ឲ្យដំណើរការសេវា 4G
- Thursday, 23 January 2014
លោក Thomas Hundt នាយកប្រតិបត្តិក្រុមហ៊ុន Smart បានបើកសម្ពោធដំណើរការបណ្ដាញថ្មីនេះ ដែលពេលនេះកំពុងប្រតិបត្តិការនៅក្នុង «តំបន់ពិសោធន៍» ចំនួន ៦ រួមមាន កាស៊ីណូ ណាហ្គា វើល ផ្សារទំនើប សុវណ្ណា ផ្សារទំនើប រតនា ផ្លាហ្សា De Castle Toul Kork ព្រលានយន្តហោះ ភ្នំពេញ និងហាង បឹងត្របែក របស់ក្រុមហ៊ុននេះ។
ប្រជាជនប្រាថ្នាចង់ប្រើប្រាស់បណ្ដាញនេះដែលសន្យាថា នឹងបង្កើនល្បឿនអ៊ីនធឺណិតរហូតដល់ ១០ ដងលឿនជាងបណ្ដាញ ៣G តែចាំបាច់ក្នុងការផ្លាស់ប្តូរស៊ីមកាតដែលមានស្រាប់របស់ខ្លួន ជាមួយនឹងស៊ីម LTE ៤G ថ្មីរបស់ក្រុមហ៊ុន Smart។
ទន្ទឹមនឹងការប្រកាសពីតំបន់របស់ LTE ៤G ត្រូវបានកម្រិតក្នុងការប្រើប្រាស់បានតែក្នុងតំបន់មួយចំនួននោះ លោក Hundt បានថ្លែងថា ក្រុមហ៊ុនមានគម្រោងពង្រីកបណ្ដាញនេះទៅផ្សារទំនើប Sorya Shopping Centre, Phnom Penh Tower, Vathanak Tower និងព្រលានយន្តហោះខេត្ត សៀមរាប នៅខែ មីនា ហើយនៅខែ មិថុនា បណ្ដាញនេះនឹងមាននៅជុំវិញជាយក្រុងភ្នំពេញ។
ប្រព័ន្ធនេះគឺត្រូវបានគេដាក់ឲ្យដំណើរការនៅ កូរ៉េខាងត្បូង ជាលើកដំបូងនៅឆ្នាំ ២០១១ គឺជាកម្មវិធីចុងក្រោយបំផុតរបស់បណ្ដាញទូរស័ព្ទអ៊ីនធឺណិតត្រូវបាន អនុម័តដោយសហភាពទូរគមនាគមន៍អន្តរជាតិ និងអាចបង្កើនល្បឿនក្នុងការទាញយករហូតដល់ ១៥០ មេហ្គាបៃក្នុងមួយវិនាទី។
នៅក្នុងដំណើរការអ្នកប្រើប្រាស់ដែលចង់ទាញយកបទចម្រៀងមានទំហំ មួយមេហ្គាបៃនឹងចំណាយពេលពីរវិនាទីតែប៉ុណ្ណោះ បើធៀបទៅបណ្ដាញ ៣G គឺចំណាយពេល ២០ វិនាទី។ ការទាញយកវីដេអូទំហំ ២៥ មេហ្គាបៃនឹងត្រូវការ ១០ វិនាទី ធៀបនឹង ១០០ វិនាទី។ ហើយចំពោះវីដេអូ HD ទាំងមូលនឹងត្រូវការប្រហែល ៣០ វិនាទីក្នុងការទាញយកបើធៀបនឹងប្រហែល ៥ ម៉ោងនៅលើបណ្ដាញ ៣G។
យោងតាមក្រុមហ៊ុន Smart តម្លៃនៃការប្រើប្រាស់ល្បឿនអ៊ីនធឺណិតថ្មីនេះគឺ ៥០០ គីឡូបៃក្នុងមួយសេន អាមេរិក។ គម្រោងនេះចាប់ផ្ដើមក្នុងតម្លៃ ៥ ដុល្លារអាមេរិកក្នុងមួយខែ ហើយផ្ដល់ជូនអ្នក ១ ជីហ្គាបៃ និងឧបករណ៍ទូរស័ព្ទមួយគ្រឿងចាប់ពីថ្ងៃ ទី២៥ ខែ មករា។
ការដំណើរការរបស់ក្រុមហ៊ុន Smart ធ្វើឡើងបន្ទាប់ពីប្រតិបត្តិករទូរស័ព្ទចល័ត CooTel គ្រប់គ្រងដោយវិនិយោគិន ចិន បានដំណើរការបណ្ដាញ ៤G របស់ខ្លួនកាលពីថ្ងៃ ទី១ ខែ វិច្ឆិកា ប៉ុន្តែលោកអគ្គនាយកក្រុមហ៊ុន Smart បានច្រានចោលផលិតផលរបស់គូប្រកួតប្រជែងរបស់ខ្លួនដោយនិយាយថា ពួកគេមិនកំពុងប្រតិបត្តិការបច្ចេកវិទ្យា ៤G «ពិតប្រាកដ» នោះទេ។
ក្រុមហ៊ុន Smart ដែលបច្ចុប្បន្នមានអតិថិជន ៥,៦ លាននាក់ក្នុងចំណោមអតិថិជន ១៩ លាននាក់ដែលបានព្យាកររបស់ប្រទេសនេះ លោក Hundt បានថ្លែងថា៖ «មាន ISP មួយចំនួននៅកម្ពុជាដែលនិយាយថា ពួកគេកំពុងប្រតិបត្តិការបណ្ដាញ ៤G។ អ្វីក៏ដោយដែលពួកគេកំពុងប្រើប្រាស់គឺមិនមែនជាបណ្ដាញ ៤G ទេ។ យើងត្រូវធ្វើឲ្យបញ្ហានោះមានការច្បាស់លាស់»៕ B.P
No comments:
Post a Comment
Thank so much for your comments or idea
please contact us for more detail report
ouchleng@gmail.com
855-16705 567