ទីក្រុងរណប តំបន់ជើង​ឯក

Thursday, 23 January 2014 17:06 ដោយ៖ដើមអម្ពិល(DAP)-ID:078

ភ្នំពេញៈ អភិបាលរាជធានីភ្នំពេញ លោក ប៉ា សុជាតិវង្ស នៅរសៀលថ្ងៃទី២៣ ខែមករា ឆ្នាំ២០១៤ នេះ បានបើក កិច្ចប្រជុំ ជាមួយអាជ្ញាធរពាក់ព័ន្ធ រួមនិងដៃគូអភិវឌ្ឍន៍ ដើម្បីពិភាក្សា អំពីការអភិវឌ្ឍន៍ ទីក្រុងរណបក្នុង តំបន់ ជើងឯក។
នាសាលប្រជុំសាលារាជធានីភ្នំពេញ លោក ប៉ា សុជាតិវង្ស អភិបាលរាជធានីភ្នំពេញ បានថ្លែងទៅកាន់ អាជ្ញាធរ ពាក់ព័ន្ធ ក៏ដូចជាដៃគូអភិវឌ្ឍន៍ ធ្វើយ៉ាងណាត្រូវពន្លឿន ការអភិវឌ្ឍន៍ទីក្រុងរណប ក្នុងតំបន់ជើងឯក ឲ្យបានឆាប់ រហ័យបំផុត សំខាន់គឺក្នុងឆ្នំា២០១៤ នេះតែម្តង ។
បើយោងតាមសេចក្តី សម្រេចស្តីពីការបង្កើតគណៈកម្មការ និងអនុគណៈកម្មការអភិវឌ្ឍន៍ទីក្រុងរណប តំបន់ជើងឯក ដែលបានអនុម័តកាលពី ថ្ងៃទី១៧ ខែមករា ឆ្នាំ២០១៤ កន្លងទៅនេះ អភិបាលរាជធានីភ្នំពេញ លោក ប៉ា សុជាតិវង្ស បានសម្រេចបង្កើតគណៈកម្មការ អភិវឌ្ឍន៍ទីក្រុងរណប តំបន់ជើងឯក ស្ថិតនៅក្នុងខណ្ឌមានជ័យ ខណ្ឌដង្កោ ដែលក្នុងនៅមាន សមាជិកចំនួន៣២នាក់ មានភារកិច្ច ទី១.បានសម្រេចឲ្យ ក្រុមគណៈកម្មការទាំងនោះ ត្រូវសិក្សាប្លង់គោល និងត្រួតពិនិត្យការអនុវត្ត ប្លង់គោល និងប្លង់លំអិតនៃការប្រើប្រាស់ ដីធ្លីក្នុងតំបន់អភិវឌ្ឍន៍ ទីក្រុងរណប នៅតំបន់ជើងឯក ឲ្យបានត្រឹមត្រូវតាមលក្ខណៈបច្ចេកទេស, ទី២.ពិនិត្យស្រាវជ្រាវស្ថិតិប្រជាពលរដ្ឋ នៅក្នុងតបន់អភិឌ្ឍន៍ ទីក្រុងរណប នៅតំបន់ជើងឯក ឲ្យបានត្រឹមត្រូវចំនួនជាក់ស្តែង និងញែកឲ្យច្បាស់ រវាងម្ចាស់ ផ្ទះ និងអ្នកជួល, ទី៣.ធ្វើការសម្របសម្រួល ដើម្បីដោះស្រាយ ផលប៉ះពាល់ផងដែរ, ទី៤.គណៈកម្មការអាចបង្កើត អនុគណៈកម្មការជាក្រុម ជំនួយការធ្វើសេនាធិការ តាមការជាក់ស្តែង និងទី៥.ធ្វើរបាយការណ៍ ពីលទ្ធផលការងារ ដើម្បីរាយការណ៍ មកអភិបាលរាជធានីភ្នំពេញ។
ជាមួយគ្នានោះដែរ អនុគណៈកម្មការពីរ ក៏ត្រូវបានបង្កើតផងដែរ សម្រាបសម្រួលដល់ដំណើរ ការអភិវឌ្ឍន៍ ទីក្រុងរណប តំបន់ជើងឯកនេះ ក្នុងនោះអនុគណៈកម្មការបច្ចេកទេស មានសមាជិកចំនួន១៦រូប មានភារកិច្ច សិក្សាប្លង់មេ នៃគម្រោងអភិវឌ្ឍន៍ ទីក្រុងរណបតំបន់ជើងឯក និងអនុវត្តប្លង់លំអិត ដោយផ្អែកលើប្លង់គោល ដើម្បីរៀបចំហេដ្ឋារចនាសម្ព័ន្ធ នៅតំបន់អភិវឌ្ឍន៍ទីក្រុងរណប តំបន់ជើងឯក ឯអនុគណៈកម្មការដោះស្រាយ ផលប៉ះពាល់មានសមាជិក២០ រូប មានភារកិច្ច ធ្វើការសម្របសម្រួល ស្រាវជ្រាវ និងដោះស្រាយផលប៉ះពាល់ ដល់ប្រជាពលរដ្ឋនៅតំបន់អភិវឌ្ឍន៍ ទីក្រុងរណបតំបន់ជើងឯក, ពិនិត្យ និងរៀបចំស្ថិតិ ឲ្យបានច្បាស់លាស់ និងសិក្សាពិនិត្យ ដោះស្រាយសំណូមពរ និងពាក្យបណ្តឹងតវ៉ារបស់ប្រជាពលរដ្ឋ ៕