OCIC កំពុងសង់ផ្សារជូនប្រជាពលរដ្ឋដែលទទួលរងផលប៉ះពាល់ពីគម្រោងអភិវឌ្ឍន៍បុរីជ្រោយចង្វារ
- Thursday, 16 January 2014
- ស៊ីវ ម៉េង
លោក កែវ សុទ្ធី ជំនួយការអគ្គនាយករងធនាគារ កាណាឌីយ៉ា ដែលជាបុត្រសម្ព័ន្ធមួយរបស់ក្រុមហ៊ុន OCIC បានប្រាប់ថា ការដោះស្រាយផលប៉ះពាល់លើគម្រោងអភិវឌ្ឍន៍បុរីជ្រោយចង្វារដែល គ្របដណ្តប់លើសង្កាត់ចំនួនបី គឺសង្កាត់ ជ្រោយចង្វារ សង្កាត់ ព្រែកលៀប និងសង្កាត់ ព្រែកតាសេក បាននិងកំពុងចាប់ផ្តើម។
លោកបានបន្តថា រហូតមកដល់ពេលនេះយើងបានដោះស្រាយរួចរាល់លើ ៧០ ក្បាលដីរួចមកហើយ។ ប្រជាពលរដ្ឋដែលរស់នៅក្នុងសង្កាត់ ព្រែកតាសេក ត្រូវបានដោះស្រាយជូនមុនគេ។ ប្រជាពលរដ្ឋអាចទទួលយកសំណងពីក្រុមហ៊ុនជាតូបផ្សារផ្ទះពី ១ ទៅ ២ ល្វែង អាស្រ័យលើទំហំដីរបស់ពួកគេដែលបានរងផលប៉ះពាល់ពីគម្រោងនេះ។
លោកបានថ្លែងថា៖ «ចាប់តាំងពីបានចុះកិច្ចព្រមព្រៀងជាមួយសាលារាជធានីភ្នំពេញមក ក្រុមហ៊ុនបានចាប់ផ្តើមធ្វើការអភិវឌ្ឍគម្រោងខាងលើនេះជាប់រហូត។ ក្រុមហ៊ុនធ្វើការដោះស្រាយផលប៉ះពាល់ជាមួយប្រជាពលរដ្ឋតាមជំហាន ហើយបើប៉ះចំកន្លែងណាដោះស្រាយកន្លែងនោះ»។
លោកបានប្រាប់ទៀតថា៖ «ពេលនេះក្រុមហ៊ុនកំពុងចាក់ដីបំពេញដើម្បីត្រៀមចាប់ផ្តើមសង់ផ្ទះ ល្វែង និងអគារស្នាក់នៅរួមលក់ជូនមន្ត្រីរាជការដែលមានប្រាក់ចំណូលទាបនៅ រាជធានីភ្នំពេញដោយយើងនឹងលក់ផ្ទះក្នុងតម្លៃទាប ព្រមទាំងផ្តល់សេវាកម្មបង់រំលស់ជូនពួកគាត់ទៀតផង។ ឈ្មោះមន្ត្រីរាជការសាលារាជធានីភ្នំពេញ នឹងរៀបចំផ្តល់ជូនមកក្រុមហ៊ុននៅពេលខាងមុខ»។
តាមគម្រោងការអភិវឌ្ឍន៍បុរី ជ្រោយចង្វារ ទីក្រុងនៃអនាគតគ្រោងនឹងចំណាយទឹកប្រាក់វិនិយោគចំនួន ១,៦ ពាន់លានដុល្លារអាមេរិក។
លោក កែវ សុទ្ធី បានប្រាប់ឲ្យដឹងផងដែរថា នៅពេលខាងមុខក្រុមហ៊ុននឹងសង់ផ្លូវមេថ្មីមួយក្នុងទីក្រុងរណបនេះ ដែលស្របគ្នានឹងផ្លូវជាតិលេខ ៦ ព្រមទាំងមានគម្រោងសង់ស្ពានថ្មីមួយទៀតដែលស្ថិតនៅម្តុំឃ្លាំង សាំងក្រុមហ៊ុន សូគីម៉ិច ឆ្ពោះទៅកាន់តំបន់អភិវឌ្ឍន៍នេះ ប៉ុន្តែលោកមិនបានបញ្ជាក់ឲ្យដឹងថា ការសាងសង់នឹងត្រូវចាប់ផ្តើមនៅពេលណានោះទេ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងថា សាលារាជធានីភ្នំពេញបានបង្កើតគណៈកម្មការមួយដើម្បីដោះស្រាយផល ប៉ះពាល់ចំពោះប្រជាជនពីគម្រោងអភិវឌ្ឍន៍នេះ ដោយមកដល់ពេលនេះបានដោះស្រាយជាមួយប្រជាជនបានច្រើនគ្រួសាររួច ហើយ ហើយរំពឹងថា ការដោះស្រាយនឹងបញ្ចប់នៅចុងឆ្នាំ ២០១៤ ខាងមុខនេះ។
ទាក់ទងនឹងចំនួនមន្ត្រីរាជការមានប្រាក់ចំណូលទាបដែលសាលា រាជធានីកំពុងរៀបចំបញ្ជីឈ្មោះនោះលោក ឌីម៉ង់ មានប្រសាសន៍ថា៖ «សាលារាជធានីមិនបានស្រាវជ្រាវ ឬចងក្រងនោះទេ ព្រោះយើងមិនដឹងថា មានមន្ត្រីរាជការមានប្រាក់ចំណូលទាបប៉ុន្មានគ្រួសារនៅទូទាំង ប្រទេសឡើយ»។
លោក ហ៊ុន ឆុន ចៅសង្កាត់ ព្រែកតាសេក មិនអាចទាក់ទងសុំការបំភ្លឺបានទេ។ ប៉ុន្តែលោក ព្រាប មុនី ចៅសង្កាត់ ព្រែកលៀប បាននិយាយថា ខាងក្រុមហ៊ុននិងសាលារាជធានីភ្នំពេញបានថយ ១០០ ម៉ែត្រ ពីផ្លូវជាតិលេខ ៦ និងឃ្វៀលលំនៅឋានរបស់ប្រជាជនចេញដោយព្យាយាមធ្វើមិនឲ្យប៉ះពាល់។ តែទោះបីជាយ៉ាងណាក៏មានប៉ះពាល់ដីប្រជាជនចំនួន ២០០ គ្រួសារផងដែរ ដោយអ្នកខ្លះជាអ្នករស់នៅក្នុងតំបន់នេះ និងមួយចំនួនទៀតជាអ្នកនៅខាងក្រៅ។
លោកបានអះអាងថា៖ «ការដោះស្រាយរបស់ក្រុមហ៊ុនល្អ គឺមានភាពទន់ភ្លន់ដែលធ្វើឲ្យប្រជាពលរដ្ឋរស់នៅតំបន់នេះសម្រេច លក់ដីជូនក្រុមហ៊ុនជាបណ្តើរៗ។ ខ្លះដូរយកផ្ទះតាមរយៈការចរចារវាងតម្លៃដី និងផ្ទះដែលក្រុមហ៊ុនសង់លក់នៅពេលខាងមុខ»។
លោក ពេជ សារឿន ចៅសង្កាត់ ជ្រោយចង្វារ បានប្រាប់ថា ម្ចាស់ក្បាលដីក្នុងមូលដ្ឋានរបស់លោកចំនួន ៥៥ គ្រួសារបានរងផលប៉ះពាល់ពីគម្រោងអភិវឌ្ឍន៍ខាងលើ។ ចំណែកអ្នកនៅខាងក្រៅដែលទិញដីនៅក្នុងសង្កាត់ ជ្រោយចង្វារ លោកមិនបានបញ្ជាក់ឲ្យដឹងថាមានចំនួនប៉ុន្មាននោះទេ។
លោកបន្តថា ក្នុងចំណោមម្ចាស់ក្បាលដីទាំង ៥៥ គ្រួសារនោះ មានម្ចាស់ក្បាលដីចំនួន ២ ហើយដែលទទួលយកគោលការណ៍ដោះស្រាយរបស់ក្រុមហ៊ុន។
សង្កាត់ ជ្រោយចង្វារ ទទួលរងផលប៉ះពាល់ច្រើនជាងគេ ពីគម្រោងអភិវឌ្ឍន៍ខាងលើ ប៉ុន្តែគេមិនទាន់ដឹងចំនួនជាក់លាក់ពីផលប៉ះពាល់នោះទេ ពីព្រោះក្រុមហ៊ុនមិនទាន់បូមដីមកដល់តំបន់នេះនៅឡើយទេ។
លោក សារឿន បានថ្លែងថា៖ «យើងបានជូនដំណឹងជាបន្តបន្ទាប់ដល់ប្រជាជនឲ្យបានដឹងពីការបូម ខ្សាច់ចូលតំបន់ និងពីហេតុផលដែលពួកគេអាចជួបចរចាជាមួយក្រុមហ៊ុន និងសាលារាជធានីភ្នំពេញលើដីដែលក្រុមហ៊ុនបានប៉ះពាល់»៕
No comments:
Post a Comment
Thank so much for your comments or idea
please contact us for more detail report
ouchleng@gmail.com
855-16705 567