លោក ជិន សុផាត ប្រើស្បែកជានគរបាលប្រឆាំងបទល្មើសសេដ្ឋកិច្ច និងយកអំណាចលោក អាត់ ខែម ជាស្នងការនគរបាលខេត្តកំពង់ឆ្នាំង កាងឈើខុសច្បាប់
ខេត្តកំពង់ឆ្នាំង ៖
ប្រភពព័ត៌មានពីឈ្មួញរកស៊ីឈើគ្រញូងបានលួចប្រាប់តាមទូរស័ព្ទថា
មន្ត្រីប៉ូលីស មោះ ជិន សុផាត
ជាមន្ត្រីប៉ូលិសប្រឆាំងបទល្មើសសេដ្ឋកិច្ចនៃស្នងការដ្ឋានខេត្តកំពង់ឆ្នាំង
បានប្រើប្រាស់អំណាច និងតួនាទី ដើរប្រមាញ់ចាប់ឈើពីអ្នករកស៊ីដទៃផង
និងគាបឲ្យឈ្មួញរកស៊ីឈើបង់លុយឆៅៗផងនិង
និងយកអំណាចមេប៉ូលីសខេត្តស្ទឹងត្រែងកាងជំនួញឈើខុសច្បាប់ផង។
ផ្លូវជាតិលេខ៥ ឆ្លងកាត់ខេត្តកំពង់ឆ្នាំង
គឺជាទីតាំងឆ្លងកាត់របស់ក្រុមឈ្មួញរកស៊ីដឹកជញ្ជូនឈើយ៉ាង
អនាធិបតេយ្យបំផុតមិនសូវមានការបង្ក្រាបទេ
ហើយករណីខ្លះដែលមានការបង្ក្រាបនោះសុទ្ធសឹងតែជាប្រភេទឡានដឹកឈើ
លោតឆ័ត្រមិនបានចូលបង់លុយ
ឬមិនបានពឹងអាស្រ័យឲ្យសមត្ថកិច្ចពាក់ព័ន្ធជួយរត់ការបើកផ្លូវ។
ដូច្នេះឈ្មួញធំៗដែលរកស៊ីដឹកជញ្ជូនឈើប្រណីតឆ្លងកាត់
ខេត្តកំពង់ឆ្នាំង ទាំងយប់ទាំងថ្ងៃ
បានដឹងពីរបៀបរបបត្រូវចូលបង់លុយយ៉ាងច្បាស់ដូចថ្ងៃរះ
ទើបពួកគេមិនដែលជួបឧបសគ្គ
ប៉ុន្តែសម្រាប់ប្រជាពលរដ្ឋឬឈ្មួញតូចតាចដែលគ្រាន់តែដឹកឈើ
បន្តិចបន្តួចភ្លេចចូលបង់លុយក៏ត្រូវសមត្ថកិច្ចពាក់ព័ន្ធដែលប្រចាំការ
តាមដងផ្លូវចាប់ឃាត់បង្ខំឲ្យបង់លុយទៅតាមតែទំនើងចិត្ត។
លោក អាត់ ខែម ជាស្នងការនគរបាលខេត្តកំពង់ឆ្នាំង
ហាក់ដូចជាធូររលុងបណ្តែតបណ្តោយឲ្យនគរបាលសេដ្ឋកិច្ចក្រោមបញ្ជារបស់លោក
ជិន សុផាត
ធ្វើអ្វីៗតាមតែអំពើចិត្តមិនក្រែងញញើតពីការរឹតបន្តឹងរបស់
ថ្នាក់លើឬអង្គភាពប្រឆាំងអំពើពុករលួយនោះទេ។
ជាក់ស្តែងកាលពីប៉ុន្មានថ្ងៃមុននេះ
នគរបាលសេដ្ឋកិច្ចក្រោមបញ្ជាផ្ទាល់របស់លោក ជិន សុផាត
បានចុះចាប់រថយន្តដឹកឈើប្រណីតមួយគ្រឿងនៅឃុំទឹកហូត ស្រុកទឹកផុស
ដោយរឹបអូសបានដើមម្រះព្រៅភ្នំចំនួន២៩ដុំ
និងឈើធ្នង់មុខកាត់ធំៗជាច្រើនដុំទៀតផងដែរ
ហើយក្នុងប្រតិបត្តិការនោះឃាត់ខ្លួនបានកម្មករលើកឈើម្នាក់
នាំទៅសួរចម្លើយ រីឯអ្នកបើកបររថយន្តនិងម្ចាស់ឈើ
បានរត់គេចខ្លួនភ្លាមៗខណៈដែលនគរបាលសេដ្ឋកិច្ចឡោមព័ទ្ធទីនោះជុំជិត។
មកដល់ម៉ោងនេះលោក ជិន សុផាត
មិនទាន់បានរាយការណ៍ពីករណីឃាត់ចាប់រថយន្តដឹកឈើប្រណីតនោះជូនលោក ឈួ
ចាន់ឌឿន ជាអភិបាលខេត្តកំពង់ឆ្នាំងនៅឡើយទេ
បើទោះបីជាមានព័ត៌មានភ្ញាក់ផ្អើលពេញខេត្តកំពង់ឆ្នាំងថា
អំឡុងប្រតិបត្តិការចាប់ឡានដឹកឈើប្រណីតនោះ គេឃើញលោក ជិន សុផាត
បានបោយដៃឲ្យសញ្ញាទៅជនសង្ស័យចំនួន២នាក់ជាម្ចាស់ឈើ
និងជាអ្នកបើករថយន្តឲ្យរត់ចូលព្រៃ។តាមសាក្សីជាច្រើនបានមើលឃើញ
ជាក់ច្បាស់នឹងភ្នែកថា
នគរបាលសេដ្ឋកិច្ចដែលដឹកនាំបញ្ជាផ្ទាល់ដោយលោក ជិន សុផាត
ឃាត់ខ្លួនជនសង្ស័យបានចំនួន៣នាក់ក៏ដោយទីបំផុតនៅសល់តែកម្មករម្នាក់
ប៉ុណ្ណោះ នាំមកកសាងសំណុំរឿង។ មានការបញ្ជាក់ផងដែរថា មុនពេលលោក ជិន
សុផាត បោយដៃជាសញ្ញាឲ្យជនសង្ស័យជាម្ចាស់ឈើ
និងអ្នកបើករថយន្តចំនួន២នាក់រត់គេចខ្លួនបន្ទាប់ពីឃាត់ឡានដឹកឈើ
អស់រយៈពេលកន្លះម៉ោង គឺលោក ជិន សុផាត
បានលើកទូរស័ព្ទជាមួយភាគីម្ខាងដែលមិនស្គាល់អត្តសញ្ញាណអស់រយៈពេល
ដ៏យូរ
ហើយក៏មានហេតុការណ៍ផ្តល់សញ្ញាឲ្យជនសង្ស័យទាំង២នាក់នោះរត់គេច
ផុតពីការផ្តន្ទាទោស។
ប៉ុន្តែលោក អាត់ ខែម ជាស្នងការនគរបាលខេត្តកំពង់ឆ្នាំង
ធ្វើមិនដឹងមិនឮចំពោះបញ្ហានេះ
ដែលសូម្បីតែអភិបាលខេត្តក្នុងនាមជាប្រធានគណៈបញ្ជាការឯកភាពក៏មិនមាន
របាយការណ៍ពាក់ព័ន្ធនឹងការចាប់ឡានដឹកឈើប្រណីតនោះដែរ។
នៅពេលរឿងរ៉ាវនៃការដើរតួនាទីជានគរបាលយុត្តិធម៌ផង និងជាតុលាការផង
ក្នុងការដោះលែងជនសង្ស័យចំនួន២នាក់ឲ្យរត់គេចខ្លួនក្នុងករណីបង្ក្រាប
ឡានដឹកឈើប្រណីតប្រព្រឹត្តដោយលោក ជិន សុផាត
បានបែកធ្លាយជាសាធារណៈផ្អើលពេញខេត្តកំពង់ឆ្នាំង ស្រាប់តែលោក អាត់ ខែម
បាននិយាយបុងថា លោកនឹងចាត់ចែងស៊ើបអង្កេតបញ្ហានេះឡើងវិញ
ហើយបើរកឃើញមន្ត្រីណាប្រព្រឹត្តខុសនឹងចាត់វិធានការដាក់ពិន័យទៅតាម
ច្បាប់។
ប៉ុន្តែមកដល់ពេលនេះ មិនទាន់ឃើញមានចំណាត់ការណាមួយនៅឡើយទេ
មិនដឹងជាលោក អាត់ ខែម ស៊ើបអង្កេតស្រាវជ្រាវដល់ណា
ព្រោះរយៈពេល១សប្តាហ៍កន្លងផុតទៅ លោក ជិន សុផាត នៅតែក្រអឺតក្រទមដដែល
ធ្វើដូចជាអត់មានរឿងអ្វីកើតឡើងសោះ។ ពាក់ព័ន្ធករណីដែល ជិន សុផាត
សម្របសម្រួលឲ្យជនសង្ស័យ២នាក់រត់គេចខ្លួនដោយសុវត្ថិភាពនោះ
អភិបាលខេត្តកំពង់ឆ្នាំង ក៏បានប្រាប់អ្នកកាសែតថាលោកមិន
ទាន់ទទួលបានរបាយការណ៍លម្អិតណាមួយទេ ពាក់ព័ន្ធនឹងករណីនេះ
ហើយបើមានករណីដោះលែងជនល្មើសឲ្យរត់គេចខ្លួនមែននោះ
មន្ត្រីប្រព្រឹត្តខុសនឹងត្រូវទទួលទោសតាមច្បាប់។
នេះមិនមែនជាលើកទី១ទេ ដែលលោក ជិន សុផាត
បានប្រើប្រាស់តួនាទីរបស់ខ្លួនទៅពាក់ព័ន្ធជាមួួយបទល្មើសនៃ
ការដឹកជញ្ជូនឈើខុសច្បាប់ គឺនៅមានករណីជាច្រើនទៀត
ដូចជាការបញ្ជូនមន្ត្រីនគរបាលសេដ្ឋកិច្ចឲ្យចុះទៅដាក់ប៉ុស្តិ៍ជជុះ
យ៉ាងប្រសេចប្រសាចតាមដងផ្លូវ
ដើម្បីរាប់ក្បាលឡានដឹកឈើយកលុយមិនដែលខ្វល់ខ្វាយពីការបង្ក្រាបទៅតាម
តួនាទីរបស់ខ្លួននោះទេ។
ហើយបើនិយាយពីក្រុមឈ្មួញធំៗវិញសុទ្ធសឹងតែស្គាល់ចិត្តស្គាល់ថ្លើម
លោក ជិន សុផាត យ៉ាងច្បាស់មិនដែលហ៊ានមើលរំលងទេ
គ្រប់ការដឹកជញ្ជូនឈើឆ្លងកាត់ផ្លូវជាតិលេខ៥
ក្រុមឈ្មួញតែងតែជូនដំណឹងនិងចូលបង់លុយជូននគរបាលសេដ្ឋកិច្ចរបស់លោក
ជិន សុផាត ដើម្បីកុំឲ្យមានឧបសគ្គ។
ពេលខ្លះតួនាទីរបស់នគរបាលសេដ្ឋកិច្ចក្រៅពីការដើរប្រមូលលុយពីឈ្មួញ
ដឹកជញ្ជូនឈើខុសច្បាប់គេសង្កេតឃើញនគរបាលចរាចរណ៍បានចេញមុខបង្ក្រាប
ការដឹកជញ្ជូនឈើជំនួសលោក ជិន សុផាត បានជាច្រើនករណី
និងទទួលបានការកោតសរសើរជាបន្តបន្ទាប់។
គេមិនច្បាស់ទេថា តើលោក អាត់ ខែម ដែលជាស្នងការខេត្តកំពង់ឆ្នាំង
និងលោក ជិន សុផាត មានទំនាក់ទំនងអ្វី ពិសេសជាមួយគ្នានោះទេ
បានជាកំហុសឆ្គងរបស់លោក ជិន សុផាត សឹងរាប់ភ្លេចទៅហើយ
មិនដែលមានការដាក់ពិន័យ ផ្ទុយទៅវិញលោក ជិន សុផាត
កាន់តែមានឥទ្ធិពលអំណាចពង្រាយនគរបាលសេដ្ឋកិច្ចក្រោមឱវាទរបស់គាត់
ចុះប្រមូលលុយពីការដឹកជញ្ជូនឈើខុសច្បាប់និងការដឹកជញ្ជូនទំនិញយ៉ាង
ប្រសេចប្រសាច។ ។ ករណីខាងលើនេះប្រជាពលរដ្ឋ
សំណូមពរឲ្យអគ្គស្នងការនគរបាលជាតិ ពិនិត្យមើលករណីដែលលោក ជិន
សុផាតកូនចៅសំណព្វលោក អាត់ ខែម
ជាស្នងការនគរបាលខេត្តកំពង់ឆ្នាំងកំពុងសុខស្រួលក្នុងការប្រមូលលុយ
ពីបទល្មើសនិងការដាក់ប៉ុស្តិ៍ជជុះតាមផ្លូវ
កោសរូសអ្នករកស៊ីដឹកទំនិញឡើងវិញផង៕
No comments:
Post a Comment
Thank so much for your comments or idea
please contact us for more detail report
ouchleng@gmail.com
855-16705 567