Naga World ចំណាយទុនវិនិយោគបន្ថែម៣៦៩លានដុល្លារ
- Thursday, 02 January 2014
- ស៊ីវ ម៉េង
ការដ្ឋានសាងសង់ ណាហ្គា ២ ដែលស្ថិតនៅទល់មុខរង្វង់សម្តេចព្រះសង្ឃរាជ ជួន ណាត ។ រូបថត ហុង មិនា
តាម សេចក្តីប្រកាសព័ត៌មានដែលចេញផ្សាយនៅលើគេហទំព័ររបស់ក្រុមហ៊ុននាពេល ថ្មីៗនេះបានឲ្យដឹងថា ក្រុមហ៊ុនចាប់ផ្តើមអភិវឌ្ឍន៍គម្រោងទី២ដែលមានទឹកប្រាក់ចំនួន ៣៦៩លានដុល្លារ ហើយនៅទីនោះនឹងអាចដាក់តុល្បែងបានចំនួនចន្លោះពី២០០-៣០០ប្រភេទ ហ្គេមម៉ាស៊ីន ចំនួន៥០០ និងកន្លែងលេងប្រភេទ វីអាយភី ចំនួន៥០កន្លែងទៀត។ លើសពីនេះទីនោះក៏នឹងមានសណ្ឋាគារមួយដែលមានបន្ទប់ចំនួន ១០៣៣ សាលសន្និសីទដែលអាចផ្ទុកមនុស្សបាន៤០០០នាក់ និងមានចំណតរថយន្តធំទូលាយទៀតផង។
បច្ចុប្បន្នគេសង្កេតឃើញថា ការដ្ឋានគម្រោងទី២នេះកំពុងដំណើរការទៅមុខយ៉ាងសកម្ម ខណៈតាមផែនការគម្រោងទាំងមូលគ្រោងនឹងបញ្ចប់នៅចុងឆ្នាំ២០១៥ ខាងមុខនេះ។
សេចក្តីប្រកាសព័ត៌មានខាងលើបានបន្តឲ្យដឹងថា គម្រោងនេះបែងចែកជាបីផ្នែកសំខាន់ៗរួមមាន TSCLK Integrated Complex, Naga city walk and Tour Park និងតំបន់កម្សាន្តជាច្រើនផ្នែកទៀត។ នៅពេលគម្រោងនេះបញ្ចប់ Naga 2 នឹងតភ្ជាប់គ្នាជាមួយ Naga World សព្វថ្ងៃនេះដែលនឹងធ្វើឲ្យការវិនិយោគរបស់ក្រុមហ៊ុនណាហ្គា ខប កាន់តែធំថែមមួយកម្រិតទៀត ហើយវានឹងក្លាយជាកន្លែងកម្សាន្តដ៏ពេញនិយមសម្រាប់នៅនៅកម្ពុជា។
ទោះ បីជាយ៉ាងណាមកដល់ពេលនេះម្ចាស់គម្រោងមិនបានបញ្ជាក់ពីចំនួន និងកម្ពស់អគារនេះនៅឡើយទេ ប៉ុន្តែបើពិនិត្យតាមរូបភាពគម្រោងនេះជាក់ស្តែងគេអាចប៉ាន់ប្រមាណថា គម្រោង ណាហ្គា ២ នេះមានប្រមាណ៥អគារ។
លោក ឌឹត ចណ្ណា ប្រធានគ្រប់គ្រងទូទៅនៃក្រុមហ៊ុនអចលនទ្រព្យ វីអឹមស៊ី បាននិយាយថា គម្រោងនេះមានលក្ខណពិសេសមួយចំនួនដូចជា ទី១ជួយលើកកម្ពស់សោភណភាពរាជធានីភ្នំពេញឲ្យកាន់តែមានភាពទាក់ទាញ ទី២ ជួយលើកកម្ពស់វិស័យទេសចរណ៍ ទី៣រួមចំណែកលើកកម្ពស់វិស័យអចលនទ្រព្យនៅកម្ពុជា និងទី៤បង្ហាញពីស្ថិរភាពនយោបាយ និងការរីកចម្រើនរបស់វិស័យសេដ្ឋកិច្ចនៅកម្ពុជា។
លោកថ្លែង ថា៖«គម្រោងនេះស្ថិតនៅចំទីតាំងល្អសម្រាប់អភិវឌ្ឍន៍វិស័យ អចលនទ្រព្យនៅកម្ពុជា ព្រោះវានៅជិតមាត់ទន្លេ ដែលជាកន្លែងមានខ្យល់អាកាសល្អបរិសុទ្ធ»។
លោក គុយ វ៉ាត អគ្គនាយកក្រុមហ៊ុន វីត្រាស់ បាននិយាយយ៉ាងខ្លីថា សម្រាប់អ្នកនិយមលេងល្បែងគេគិតថាល្អ ហើយវាទាក់ទាញអ្នកវិនិយោគ ព្រោះអ្នកវិនិយោគមួយចំនួនក៏ចូលចិត្តលេងល្បែងដែរ តែសម្រាប់អ្នកមិនចូលចិត្តល្បែង ពួកគេអាចមានគំនិតអវិជ្ជមានចំពោះគម្រោងនេះ៕
No comments:
Post a Comment
Thank so much for your comments or idea
please contact us for more detail report
ouchleng@gmail.com
855-16705 567