ផ្កាយពីរ ទៀ សុខា ពាក់ព័ន្ធជំនួញឈើក្រញូងតាមផ្លូវសមុទ្រ
|
ផ្ទុះ
រឿងអាស្រូវគួរឲ្យភ្ញាក់ផ្អើល ខណៈដែលព័ត៌មានមួយបានឲ្យ ដឹងថា
មេបញ្ជាការមូលដ្ឋានកងជើងទឹក ទទួលខុសត្រូវដែនសមុទ្រជាប់ព័ន្ធ
ទៅនឹងជំនួញឈើក្រញូង ហើយមូលដ្ឋានទ័ពជើងទឹកនៅចំណុចកោះយ៉
ភូមិប៉ាក់ខ្លង ឃុំប៉ាក់ខ្លង ស្រុកមណ្ឌលសីមា
ក្លាយជាទីតាំងស្ដុកឈើក្រញូងដែលគេត្រៀមនាំចេញទៅលក់នៅប្រទេស
វៀតណាម ។
តាម ប្រភពព័ត៌មានខាងលើបាន បញ្ជាក់ថា ក្រោយពេលដែលផ្លូវដាច់សំខាន់ៗ នៅតាមបណ្ដាលខេត្តត្រូវលិចលង់ដោយទឹកជំនន់ មុខរបររកស៊ីឈើក្រញូង ត្រូវបានក្រុមឈ្មួញទុច្ចរិតបង្វែរទិសដៅដឹកជញ្ជូនតាមផ្លូវទឹកវិញ សំខាន់តាមផ្លូវសមុទ្រ ដើម្បីនាំចេញយកទៅលក់នៅប្រទេសវៀតណាម ។ ប្រភពដដែលបន្ថែមថា មូលដ្ឋានកងទ័ពជើងទឹកនៅកោះយ៉ ឃុំប៉ាក់ខ្លង ស្រុកមណ្ឌលសីមា ដែលស្ថិតក្រោមការគ្រប់គ្រងរបស់លោកផ្កាយពីរ ទៀ សុខា បានក្លាយជាមូលដ្ឋានស្តុកឈើក្រញូងយ៉ាងរឹងមាំបំផុតហើយរាល់ការ ដឹកជញ្ជូនឈើក្រញូងតាមផ្លូវសមុទ្រ គឺចាំបាច់ត្រូវ យកទៅស្ដុកទៅមូលដ្ឋានកងទ័ពជើងទឹកកោះយ៉នោះ ។ យោងតាមអ្វីដែលបានអះអាងនោះ ប្រសិនបើពុំមានការអនុញ្ញាតិ ឬការពារ រួមទាំងមានភាគហ៊ុនពីលោក ទៀ សុខា ទេនោះ មូលដ្ឋានកងទ័ពជើងទឹកកោះយ៉ មិនអាចក្លាយជាទីតាំងស្តុកឈើខុសច្បាប់ដោយស្រួលនោះដែរ ។ មន្ត្រីជំនាញបាន និយាយថា គ្មានសមត្ថកិច្ចណាហ៊ានបង្ក្រាបជំនួញឈើក្រញូងនៅកោះកុង នោះទេ ព្រោះពួកក្រុមជនទុច្ចរិតមានកងកម្លាំងការពាររឹងមាំ ហើយរាល់ការដឹកជញ្ជូនឈើក្រញូង ត្រូវបានគេបញ្ជូន យកទៅទុកក្នុងមូលដ្ឋានកងទ័ពជើងទឹកកោះយ៉ ស្រុកមណ្ឌលសីមា ។ ដូច្នេះមន្ត្រីជំនាញទាំងអស់មិនហ៊ានក្អកនោះឡើយ ។ មន្ត្រីជំនាញបានបញ្ជាក់បន្ថែមថា ជាក់ស្តែងប៉ុន្មានជាកន្លះខែមុននេះ មន្ត្រីជំនាញបានបង្ក្រាបឈើក្រញូងដឹកតាមទូកមួយចំនួនធំ ប៉ុន្តែក្រោយការឃាត់ទុកមិនបានមួយម៉ោងផង ក៏ស្រាប់តែមានការអន្តរាគមន៍ពីអ្នកមានអំណាចឲ្យដោះលែងវិញភ្លាម ។ ដោយឡែកកាលពីវេលាម៉ោង១១និង៣០នាទីយប់ថ្ងៃទី១០ តុលា សមត្ថកិច្ច៣ស្ថាប័ន ក្នុងនោះមានមន្ត្រីរដ្ឋបាលព្រៃឈើ កម្លាំងនគរបាល និងកងរាជអាវុធហត្ថលើផ្ទៃប្រទេស ដោយមានការចូលរួមពីអង្គការសម្ព័ន្ធសត្វព្រៃ (វ៉ាយអេដ)សរុបចំនួន២២នាក់ប្រដាប់ដោយអាវុធ បានចុះប្រតិបត្តិ ការបង្ក្រាបទូកដឹកឈើគ្រញូង១គ្រឿង ដែលកំពុងដឹកឈើចូលតាមដៃសមុទ្រសំដៅបន្ទាយទាហានមួយ កន្លែងដែលគេល្បីថា« ទីនោះជារូងខ្លាស្ដុកឈើគ្រញូង»ស្ថិតត្រង់ ចំណុចកោះយ៉ ក្នុងភូមិប៉ាក់ខ្លង ឃុំប៉ាក់ខ្លង ស្រុកមណ្ឌលសីមា ។ បន្ទាប់ពីសមត្ថកិច្ចទាំង៣ស្ថាប័នខាងលើបានប្រើ អូប័របញ្ជូនកម្លាំងជាច្រើនដង យកទៅបង្កប់ខ្លួនក្នុងព្រៃ កោងកាង អមសងខាងដៃសមុទ្រក្បែរបន្ទាយកោះយ៉ អស់ជាច្រើនម៉ោងរួចមក នៅវេលាម៉ោង១១និង៣០នាទីយប់ ទើបឃើញទូកដឹក ឈើគ្រញូងបើកចូលមកដល់ ដែលសមត្ថកិច្ចបានត្រៀមមុនជាស្រេច ហើយក៏ធ្វើការឡោមព័ទ្ធនិងក្របួចជាប់តែម្ដង ។ ខណៈពេលដែលសមត្ថកិច្ចព័ទ្ធជាប់នោះ កម្មករទូកបាននាំគ្នាលោតចុះទឹកហែលគេចខ្លួនចូលព្រៃ កោងកាងអស់ទៅ ។ ព្រមជាមួយគ្នានោះដែរកម្លាំងទាហានយាមឈើគ្រញូងដែល ប្រចាំ នៅលើកោះយ៉ បានបាញ់ប្រហារមកលើសមត្ថកិច្ចប្រមាណ៧គ្រាប់ដោយអាវុធអាកា ធ្វើឱ្យមានការរំជើបរំជួលដល់ទាហានទាំងខ្មែរនិងថៃ មានការភ្ញាក់ផ្អើលយ៉ាងខ្លាំងព្រោះ«កោះយ៉»មាន ទីតាំង នៅក្បែរព្រំដែនចាំយាម ដែលសមត្ថកិច្ចទាំង២ប្រទេសប្រចាំការជាអចិន្ត្រៃយ៍ ។ ប្រភពដដែលបញ្ជាក់ទៀតថា ទោះបីមានការបាញ់មកលើសមត្ថកិច្ចយ៉ាងណាក្ដី ក៏ មិនមានការបាញ់តបតទៅលើក្រុមពាក់ស្បែកខ្លាយាមឈើ គ្រញូងទាំងនោះវិញទេ ហើយបានរិះរកមធ្យោបាយអូសទូកឈើគ្រញូងនាំមកស្នាក់ការ របស់ខ្លួនគឺ ស្នាក់ការរបស់អង្គការវ៉ាយអេដ ដែលស្ថិតនៅក្នុងភូមិកោះយ៉ ឃុំប៉ាក់ខ្លង ស្រុកមណ្ឌលសីមា ដោយប្រើប្រាស់ថិរវេលា អស់រយៈពេល៩ម៉ោងទើបមកដល់ ។ សមត្ថកិច្ចបានបញ្ជាក់ថា ការអូសទូកឈើល្មើសមកដាក់ស្នាក់ការមានចម្ងាយផ្លូវប្រហែល ១០គីឡូម៉ែត្រ ប៉ុណ្ណោះ តែប្រើពេលអស់ចំនួន៩ម៉ោងព្រោះសមត្ថកិច្ចត្រូវការលាក់ ខ្លួនពីការស្ទាក់ចាំបាញ់ប៉ុនប៉ងរំដោះយកទូកឈើនោះទៅ វិញ ពីក្រុមទាហានប្រចាំការ នៅលើកោះយ៉នោះ ។ នៅព្រឹកថ្ងៃទី១១ តុលា សមត្ថកច្ចចម្រុះទាំង៣ស្ថាប័នបានរើឈើគ្រញូងចេញពីទូក ឃើញមានចំនួន១.៩៦៥ដុំ ស្មើនឹង១២.១៥៩គីឡូក្រាមស្មើនឹងជាង១០ម៉ែត្រគូប ហើយពេលនេះវត្ថុតាងកំពុងរក្សាទុកនៅក្នុងស្នាក់ការ អង្គការវ៉ាយអេដកោះប៉ោ ។ ប្រភពពីមន្ត្រីក្នុងខេត្តជាច្រើនរូបបានសម្ដែងការសាទរ ចំពោះយុទ្ធនាការបង្ក្រាបរបស់សមត្ថកិច្ចទាំង៣ស្ថាប័នខាង លើនេះខ្លាំងណាស់ព្រោះទីតាំងស្ដុកឈើគ្រញូងមួយនេះប្រៀបដូច ជារូងខ្លា ហើយរយៈពេលកន្លងមកគ្មានសមត្ថកិច្ចណាហ៊ានទៅក្បែរទេ ទោះបីបានដឹងនិងបានឃើញយ៉ាងណាក៏ដោយ ។ ប្រភពដដែលនិយាយទៀតថា ផែនការចាប់ទូកដឹកឈើគ្រញូងមួយនេះបានការអនុញ្ញាតពីលោក ព្រះរាជអាជ្ញាអមសាលាដំបូងខេត្ត ផងដែរ ហើយផែនការច្បាស់លាស់របស់សមត្ថកិច្ចទាំង៣ស្ថាប័នខាងលើបាន រៀបចំបង្ក្រាបជនល្មើស២នាក់ដែលយកឈ្មោះថ្នាក់ដឹកនាំមក ប្រើ ។ សមត្ថកិច្ចអះអាងថា ក្នុងពេលៗឆាប់ខាងមុខ សមត្ថកិច្ចទាំង៣ស្ថាប័ននឹងដាក់ ពាក្យបណ្ដឹងទៅប្រមុខរាជ រដ្ឋាភិបាលចំពោះការបាញ់ប្រហារមកលើសមត្ថកិច្ចពីកង កម្លាំងទាហាននៅប្រចាំការលើកោះយ៉នោះ ហើយនឹងធ្វើការត្រួតពិនិត្យទីតាំងមួយនោះជាថ្មីកុំឱ្យ ស្អុយឈ្មោះតទៅទៀត ។ យ៉ាងណាក៏ដោយ មនុស្ស២នាក់ ថែមទៀត ត្រូវគេ ដឹងថា ជាអ្នកចេញមុខកាងជំនួញឈើក្រញូងនៅកោះកុងយ៉ាងសកម្មដោយគេហ៊ានទាំង យកត្រកូល «ហ៊ុន» មកប្រើប្រាស់ ដើម្បីគំរាមសមត្ថកិច្ចថែមទៀត ។ សមត្ថកិច្ចអះអាងថា ជំនួញឈើក្រញូងបានកើតមានពេញចរន្តនៅខេត្តកោះកុង ខណៈដែលជំនួញនោះ ត្រូវបានកាងដោយមនុស្ស២នាក់យកស្លាកត្រកូល «ហ៊ុន» មកប្រើក្រោមកិច្ចសហការ និងការពារដោយមេបញ្ជាការមូលដ្ឋានកងទ័ពសមុទ្រប្រចាំនៅទីនោះតែម្ដង ហើយកន្លែងស្ដុកឈើដ៏សំខាន់របស់ពួកគេ គឺមូលដ្ឋានកងទ័ពជើងទឹកប្រចាំនៅកោះយ៉នោះតែម្ដង ៕ |
No comments:
Post a Comment
Thank so much for your comments or idea
please contact us for more detail report
ouchleng@gmail.com
855-16705 567